傳統習俗,不少銀行會於農曆新年前派發掛曆、揮春、利是封、記事本等禮品給尊貴的客戶。一來希望打好關係,二來想你全年用帶有我公司Logo的禮品,當是賣個廣告。但要留意,銀行不是開善堂,新年禮品樣樣都是錢,哪會人人有份,永不落空?

每間分行都會有一個禮品配額,而老闆每年都會按大家職位同業績再分配一些禮品,讓我們留給熟客。

至於熟客的定義?你懂的。可惜,現實往往事與願違,常常幫襯我的尊貴客戶其實不大稀罕這些禮品,反倒是一些平時不見蹤影、一打電話就cut線的客戶,忽然會變得與你相熟。See,我電話又響起了。

「溫小姐,係咪有利是封攞啊?」這位是從來只做定期的「息魔」李太。

「係啊,你落嚟分行搵我呀!」見你記得我姓咩,好啦,分少少比你啦。

聽Connie姐講,以前銀行好景時,派給客人的利是封是一盒一盒地派(每盒100個),現在都是每盒拆開一兩疊一兩疊地派,寒酸很多,但無辦法,資源不足,只好肥熟客瘦生客。

「李太,好耐無見!生意幾好嗎?」她是一間中小企老闆娘,親自來向我拿利是封。

「新年靜返少少啦。不過點都要派利是比班夥記,我夥記多,你比多啲利是封我啦。」李太樣子非常誠懇。

「見係你,我比夠一盒你啦!」見她這樣說,動了惻隱之心,給了她一盒。說真的,其他客人我只給一兩疊,除非是熟客。

李太接過一盒利是封,邊放入手袋邊嚷著:「一盒?唔夠啊!我有成百個夥記,你比多一盒我啦!」我望了望自己剩餘的物資,不行,一定要留給熟客,狠心拒絕。

「唔好意思啊,我手頭上無咁多,而且我已經破咗例,其他人都只係派一兩疊。」

果然是做老闆的材料,見不得要領,李太立即變臉大鬧:「有無搞錯啊!又話有得攞,我專程嚟到你比咁少我!離晒大譜!」嘩,大姐,全銀行啲利是封比晒你好無?

結果係點?由於李太尚有自知之明,從來無種善因,當然沒有善果,她最後選擇到櫃位排隊,多拿一兩疊利是封。

「唉,點解啲人可以咁貪得無厭㗎!我好心比多啲佢,仲要比佢鬧!」向Connie姐訴苦中。

「係你蠢咋嘛!呢啲客直接叫佢去櫃位攞啦,做咩浪費自己quota啫!」對哦!一言驚醒夢中人,我怎麼沒想到?

從此以後,我決定只有熟客,才會主動打電話請他們來拿預留的禮品。至於會否得失其他像李太般的客人?我不擔心,反正只要一日有「著數」攞,一日大家仍是「朋友」。