上集：https://post.shikoto.com/posts/115000-你好，我係一個出租阿媽（上）

有人問，如果兜兜轉轉，最後對情侶真係要結婚，
結婚果日，真阿媽會出場，咁女友咪會懷疑：「咦，我之前見過你阿媽，點解唔同咗人？」
唔係講笑，呢件事真係發生過，我教咗新郎一個答案：
「我屋企情況比較複雜，阿爸花心，有幾個阿媽，
之前果個係細媽，呢個係大媽，
妳千祈唔好話畀大媽知，妳見過細媽，如果唔係大媽會嬲，妳扮無野啦。
花心真係好麻煩，我唔會好似老豆咁衰。」

一輪大媽中媽細媽，一次過滿足晒三個願望：

  1. 解釋點解阿媽唔同咗。
  2. 令佢唔會同真阿媽講，見過另一個阿媽。
  3. 順手表明心跡，講自己唔會花心。
    都話騙子嘅智慧係無限。

我以為，我下半世就係靠出租阿媽搵食，最多廿年後，升級做出租阿嫲。
直至我接到一單生意，
Shirley男友向佢求婚，Shirley知男友屋企有錢，好想敲詐一筆巨額禮金，
但佢阿媽係好清高，「嫁囡唔係賣囡」果種值得尊敬嘅女士，
所以佢就要搵我呢個，唔值得尊敬嘅騙子。

我認我係騙子，老實講，一個人無樣無學歷無技能，要兩個鐘賺千五蚊，有乜可能唔踐踏吓道德底線？

「總之，無五百萬，我唔會同意Shirley嫁畀你。」
「媽咪唔好咁啦，我地係真心相愛。」Shirley聲淚俱下，當得起最佳女配角，女主角當然係我啦。
「妳如果一定要激死阿媽，咪自己同佢結婚，唔使我同意架！」
Shirley望向男友，欲言又止，梨花帶雨：「我好希望......我嘅婚姻有媽咪祝福。」
男友無出聲。
呢場戲就咁結束，本來Shirley收唔收到禮金，我完全唔在乎，只要我收足人工就得。
但點估到，三日後，果位男朋友上咗我屋企，喺佢認知中，係我同Shirley嘅屋企。
「伯母，我諗清楚啦。您咁辛苦養大Shirley，依加我有能力，應該孝敬您。
呢五百萬您袋住啦，下星期三Shirley生日，到時我就畀個驚喜佢，話你同意咗。」
男友遞出一張五百萬嘅支票，無抬頭，Shirley點會話佢知我個名。
我拎住張支票，隻手有小小震：「真係孝順仔，我一定會祝福你地，其實邊有阿媽唔想個囡幸福......」

生日、驚喜......即係話，Shirley下星期三先會知，男友畀咗五百萬我。
我坐喺沙發，突然收到Shirley嘅Msg，嚇我一跳，原來佢係講：

「嫦姨你真係好，我阿媽唔理解我，日日嘈交，
你就溫柔慈祥，乜都支持我，仲好過真阿媽。」
係啊，阿囡，我連妳呃錢都支持妳。
點解我會好過真阿媽？
因為我唔係你阿媽，我可以睇住你做錯事、睇住你蝕底、睇住你去死。

不過有啲事，我同真阿媽......會有小小唔同，
例如我兌咗張支票，拎走果五百萬，番咗大陸。
匿咗一輪，似乎無傳媒提起呢件事，更遑論通緝我，
我小心翼翼咁番到香港，上FB一睇，見到Shirley已經搞咗豪華婚禮。
係啵，佢點敢講真相畀男友知？
蝕咗五百萬，好過蝕埋下半世嘅金龜婿。

呢五百萬，就當買個教訓......唔係，係買個阿媽啦。
出租阿媽，
給你超越真阿媽的享受。

－完－