上集：https://post.shikoto.com/posts/114229-我嘅職業係：代人去飲（上）

難免有八卦女人問：「咦，你係邊個？XX（我個客）去咗邊？」
我會答：「XX晏啲先到，我係佢兄弟，咁岩喺附近，幫佢霸住位影下相先。咦，你件衫好靚！」
無女人會深究我個垃圾解釋，佢地只係聽到「你件衫好靚」，
我再讚埋佢地皮膚靚、身材好、髮質好......無人會發現XX成晚都無到。
實驗證明，人類最關心嘅，都係自己。

因此，大家都知去飲好悶，但結婚依然會請飲。
呃，人人都話，要搞個特別嘅婚宴，
但根據我全職去飲嘅經驗，除咗有啲鮑魚特別細隻，其他野都無乜特別。

過咗半年，生意開始難做。

呢份工無須學歷、無須工作經驗，連體力都唔太需要，簡直係廢青之選，梗係愈黎愈多競爭對手。
有競爭就有價格戰，壓到100蚊都有人做，
我唔想同佢地一齊做爛市，我決定增值自己，提供特別服務！

事源係有個有錢仔，叫我「順便幫手買份結婚禮物，擺喺接待處送畀新人，貴都無所謂」。
咁我又得閒，就睇晒新郎新娘fb，研究佢地鍾意乜野，禮物再附埋結婚賀卡（下款當然係有錢仔）。
事後新郎相當感動，因為佢地只係普通朋友，佢估唔到有錢仔為咗祝福佢，會花咁多心思。
有錢仔覺得好有面，封咗封大利是畀我。

果一下有如醍醐灌頂，
點解要去飲？係為咗表達對朋友嘅重視，維持關係。

人情就係結婚禮物，但禮物要花心思，唔想為唔熟嘅人花心思，又驚送錯咗破壞關係，
乾脆折現，訂立公價；不求有功，但求無過。

從此，我嘅服務範圍，就包埋準備結婚禮物。
慢慢開始有口碑，連親身去飲嘅人，都會請我幫手買禮物。
原來，香港人最矜貴嘅，
唔係時間，而係心機。

一年後，我嘅代飲服務宣告終止，
有間Wedding Planning公司推出咗個增值服務，幫新人確認來賓身份，以免「代飲員」出席，
佢地嘅口號係「確保每一個來賓，都親身分享到你嘅喜悅」，
擺明係針對我，斷我米路。
唔想去飲？早啲訓啦。

－完－