上集：https://post.shikoto.com/posts/113202-男人一生，只為逃避一個喺麥記結婚嘅女人（上）

「咁你仲肯娶佢？」
「當初我追佢，乜貴野名牌佢都唔要，連食飯都AA制。我好感動，覺得自己係芸芸港女中，搵到絕種生物。
我傻到以為，『唔貪錢嘅女人就係好女人』。但後來先發現，佢想紅想到癲咗！去廁所都會諗點樣出名。」
「擺麥當當係慳咗一筆，但仲有度蜜月。」
阿強面容扭曲：「佢問我想爬喜馬拉雅山，定去埃塞俄比亞？登山可以顯示佢堅毅精神，蜜月去非洲關心窮人，有慈善形象，都有機會被報導。」

「我唔想死於高山症，結果我只好揀埃塞俄比亞，過兩日就出發。但係，我唔想去埃塞俄比亞度蜜月啊！我只係個普通人......」阿強愈講愈激動，流下男兒淚。
我唔知點安慰阿強。
「我寧願日日比人Chur住無上進心，每逢大時大節都要銀包出血。我後悔啦，我寧願佢貪錢，至少我估到佢想點。」
我忍唔住問：「點解你唔換過個？」
「人總有欲求，除非係聖人。啊唔係，就算係孔子，周遊列國都想Sell自己。」
「總有不求名利嘅好女仔。」我對呢個世界始終有幻想。

「不求名利，咁求乜？你肯定你滿足到佢嘅欲求？」
阿強嘆氣：「我地係想要唔貪錢嘅女人，定乜都唔想付出，想要個無欲無求嘅女人？」

呢個時候，新娘出黎，我急忙番去自己個位，
一坐低，女友就問：「你岩岩未講完就走咗，你想講咩？叫我學下新娘乜野？」
「無野要學，妳非常好，極之好。」
「口甜舌滑啦你！」
「我認真，聽晚帶妳去補番食自助餐。」

－完－