收到紅色炸彈，唔止要罰款，仲要悶足成晚。
但係今日，我好開心咁出席婚宴，唔止因為結婚嘅係老友阿強，
更因為喜帖上大大嘅麥記標誌，鴻運豬柳漢堡全體啊！
慳番高額人情之餘，仲可以趁機教育下我女友，唔好咁港女。

新娘係一個唔太紅嘅Model，即係po張自拍有幾千個Like，但出到街無人識，成就係上過一次娛樂版。
呢種俾巴打貶為「富豪玩物」、「X，全部都係X」嘅港女代表，居然肯喺麥記結婚，簡直係奇蹟。
喺麥當當叔叔嘅見證之下，新人講出「我願意」，標緻嘅新娘咬住金銀脆薯條，深情一吻。

果一下，我見到唔少港男流下感動嘅淚水，望向自己嘅女朋友。

如果食麥當當係娶得過，咁喺麥當當結婚，我已經唔知點形容。
新娘去咗換衫，我趁機教育女友：「你學下新娘......」

話未講完，我突然見到一個人，我最鍾意嘅網絡作家麥港男！以寫文踩港女聞名，我每次都偷偷地Like。
機不可失，我想拎個簽名，就見到佢快步入咗臨時新娘房。
唔通有姦情？我貼係門口偷聽。

「點樣？有無記者黎？」係新娘熱切嘅聲音。
「無......不過，我今晚幫你寫一篇《男人一生，只為尋覓一個喺麥記結婚嘅女人》，包妳爆紅。
之前張晨寫『麥記女友』幾掂，港男最buy唔貪錢嘅女人。

到有人訪問妳，妳就話，真愛係唔會計較物質，愛一個人唔係愛佢嘅條件......」
「真係得？」新娘把聲好期待。
「做衰野好容易，但你要印象正面地紅，唔緋聞唔講政治唔講粗口，得呢個方法。」
「好，紅唔紅就睇呢鋪啦！」

佢當阿強係乜？出名嘅踏腳石？
我當時做咗一個兄弟應該有嘅決定：打小報告。點都要話比阿強知！
點知，我一轉身就見到阿強。

我深吸一口氣：「你聽到晒？」
「我一早就知。」阿強嘅表情，好似喺麥當當見到漢堡包咁正常。
「咁你仲肯娶佢？」

下集：https://post.shikoto.com/posts/113292-男人一生，只為逃避一個喺麥記結婚嘅女人（下）