女人最鍾意問嘅，一定係「點解」。但係好多時，無論男人點答，都無辦法令女友滿意。
初初拍拖，問：「點解你會鍾意我？」
男人如果實際答：「因為你靚。」
真係太膚淺，女人嘅思維即刻跳到下一個step－假如有人靚過我，即係你會變心啦！
飄渺答：「因為對你有feel。」哦，即係話我唔靚。
拍緊拖，問：「點解你同班兄弟打機，無聽我電話？」
老實答：「打緊boss，緊急關頭。」哦，即係打機緊要過我。
推卸答：「電話較咗靜音。」有乜可能？我明明叫咗你較響㗎！如果我有咩危險，臨死前想打個電話比你，你咪聽唔到！
分咗手，問：「點解你唔愛我？」
飄渺答：「因為無feel。」乜野係feel？點解一開始有依加無？你分明係嫌我醜，變心！
實際答：「因為你醜。」你份人咁膚淺，太過份啦！我要唱衰你！
點解會咁？因為女人問「點解」，根本唔想知點解。
問 「點解你會鍾意我？」係想你攬實佢，強調有幾咁鍾意海枯石爛至死不移。
問「點解你無聽我電話？」係指責你做錯事，想你認衰仔，應承下次唔會。
問「點解你唔愛我？」係想你重新愛上佢......
所以，下次女友再問「點解」，你開口答「因為」，
你已經死了。
萬能key應該係：「我愛你」，加一個擁抱。
（已經唔愛咁點算？咁就算啦......）
