點解金庸小說咁多女角，係小龍女最紅，女神地位不可動搖？要做女神，係有祕訣的。
-
打扮要有性格
要做被仰望膜拜、令人動心不動欲嘅女神，當然就不能太暴露。
除咗呢樣之外，女神打扮通常有一個固定嘅Style，去展現佢個人性格，令你覺得佢好有特色，同其他人唔同（事實可能只係佢D衫好有特色）。
小龍女就係一身白衣，展現佢嘅純潔。始終，世人係膚淺嘅。 -
憂鬱嘅氣質
如果小龍女一出道就順順利利，同楊過結婚生仔，佢係做唔到女神。
太完美嘅人生勝利組，會令人覺得唔貼地。女神，總要受過挫折，間唔中顯示下佢幾受傷，先會惹人憐惜。 -
單純
人總會犯錯。而女神表現單純，無論做出黎嘅事有幾荒謬，都會被原諒，甚至美化。
例如小龍女遇到公孫止，打算嫁畀佢，就係受情傷後「自我放逐」，絕對唔係用情不專。或者係人地開緊國際會議（英雄大會）果陣，走出黎放閃，都係真情嘅表現。 -
唔貪圖物質
女神唔貪物質，至少唔可以表現出黎。一旦俾人掌握到你嘅物欲，覺得用一個LV就控制到你，仙氣突然無晒。
唔貪錢，唔代表要好窮咁樣生活。小龍女用刀槍不入嘅金絲手套、金鈴銀索，再加埋件永遠唔污糟（或者日日換）嘅白色衫，聽下都唔係普通貨色。
重點係，女神用名牌用貴野，會當普通野咁用，先突顯到不染凡塵嘅氣質。 -
靚女
如果唔靚女......之前果四點可以當無講過。
