(下)

「重生？你講真？我真係有機會重生？」我緊張的捉著衪！

「冷靜D！無錯，我可以俾機會你重生，而且你仲可以去返十二年前，你同佢分手嘅果一日，重新嚟過！」

「我……真係有機會改寫一切？同埋……點解係我？」我冷靜下來想了一下，真的會這樣順利嗎？

「你的確有機會改寫一切，但係，重生唔係咁簡單嘅事！所以，你必需要遵守一D條件！」

「果然，我都知道唔會咁簡單！究竟係咩條件？」

「第一，發生咗嘅事，我係唔可以去改變，所以你重生嘅時候，你唔可以再係陳天翔，我將會俾另一個身份你！你將會以梁洛天嘅身份重生！」

「梁洛天？個名咁熟嘅？但你話唔可以去改變發生咗嘅事！咁我重生做梁洛天，呢個人嘅人生咪會因為我而轉變囉？」

「你果然好聰明！放心，梁洛天本身係唔存在嘅！你就當係打機嘅時候，中間加入咗一個新角色就得架啦！如果你決定重生，到時你就會知道梁洛天嘅背景同所有相關資料！」

「咁又有咩用？我始終都係傷害咗Christy！」我搖了搖頭，無奈地歎了口氣！

「有無用並唔係我去幫你決定，係你自己去決定！你要用呢個身份重生嘅話，你要做咩都好，我都唔會理你！只要你唔改變陳天翔同黃芷寧分手果一刻嘅事實，你鍾意做咩都得！你可以再傷害多佢一次、又或者去過一個新嘅，無黃芷寧嘅生活、又或者，用你嘅方法，用你新嘅身份，去補救返呢件事！」

「補救？補救……無錯，我可以補救！就算改變唔到分手嘅事實，我都可以補救！我要Christy忘記陳天翔，忘記傷痛！我……我想見返佢真正嘅笑容！」對，我是可以補救的！

「好！咁我繼續啦！第二個條件，就係你唔可以，亦都唔會再擁有返你以前嘅生活！即係話，你只會做返一個普通人！無權，無錢，無女人，打死一世工！總之你點做都好，你最多只能夠做到一個普通嘅白領！如果你嘗試賺超出我地控制範圍內嘅嘢，我地會令到你擁有，果D多餘嘅嘢，我會令到果D嘢自然流失！」

「普通人？無問題！我本來就係一個公屋仔，我無問題！」

「你曾經擁有一切，但依家乜都無晒，你真係忍受到？」

「可以！調返轉諗，我都曾經擁有過，我唔會再羡慕果D人！因為我明白到，世界上的確有D嘢，係比金錢名譽地位更加重要！」

「好！好！」神滿意地點了點頭，便繼續說。

「第三個條件，好重要，你一定要記住！就係唔可以透露任何關於轉生或者你就係陳天翔嘅訊息！雖然唔會有人信你，但只要你一透露，你就會永遠消失喺呢個世界上！仲會連累到陳天翔身邊，所有有關嘅人消失！」神嚴厲的警告我！

「消失喺呢個世界？好，我明白，我唔會透露任何嘢！」我本能地知道這是很可怕的後果。

「最後，今次嘅重生，你必需要做到一樣嘢，如果唔係，你將會體驗到再次失去佢嘅感受！呢樣嘢就係!@#$%^&*！」

「吓？你講咩呀？」祂最後的那句說話，我完全不知道祂在說甚麼。

「我講多次啦，!@#$%^&*，明唔明？」

「你唔係玩我卦？我真係聽唔到喎！」我明明看著祂的口部在動，但就是聽不到祂說甚麼。

「呀！係喎，呢一刻佢仲係諗住陳天翔而唔係梁洛天！唔緊要啦，最尾果個條件，就係你重生後必需做到嘅事！當達成條件後，你就自然會知道我頭先講咩架啦！」

「吓？咁都得？」

「得！有咩唔得？你咪當打機咁，有D隱藏要素囉！咁玩起嚟先有趣味架嘛！況且，你有十二年時間去完成呢個條件，都唔錯啦！我俾多個建議你，就係唔駛特登諗果句野究竟講咩！你只需要做返你要做嘅嘢，我相信你一定做到嘅！加油啦！你準備好未？」

「吓？我仲有嘢想問架，你都未答我點解會係我？點解會俾多次機會我？」

「呢層……你總有一日會明架！時間唔夠啦，你依家只需要答我，你想唔想用梁洛天嘅身份重生？」

我沒有一絲疑惑，點了點頭！

「咁好啦！最後提多你一樣嘢，你重生之後會出現一D記憶混亂嘅情況，唔會所有嘢都記得架！所以你跟住自己本能做就得架啦！我會守護住你地架啦！」

我感到自己的身體被一陣強大的吸力，強行吸進一個黑暗的空間中！
在這個空間裏，我感到自己不斷飛行著，速度異常的快，那種因高速而引起的風壓，把我弄得很不舒服，最後，我整個人失去了意識！

「先生！先生！你無事呀嘛？」我感到四周非常嘈吵，我在哪裏？

「你…..你係？呢度係邊度嚟？」我張開雙眼，看了看眼前一名穿著制服的女性，疑惑的說。

「呢度係香港文化中心嘅職員休息室，頭先你排排下隊買飛，突然之間成個人暈低咗！你仲有無事，駛唔駛幫你Call白車？」

「唔……唔駛，我無事！」我按著額頭，看著四周，感覺好像很陌生！

「咁就好啦，如果你無事嘅話，麻煩你喺度寫返個名同簽名，我地需要做返少少程序，確認返你肯定自己無事！」女職員解釋。

「哦……好呀，無問題！」我正想動手時，發現右手自動的動起來，不對，這不是我的名字，這個也不是我簽名！

「唔該晒！好，梁生，咁如果你無事嘅話，我帶你返出去大堂啦！」女職員禮貌的把我請離休息室。

在離開休息室途中，我詢問了今天旳日子，是十二月二十四日！

「今年應該係2004年，係咪呀？」我嘗試詢問。

「今年係2004年呀！梁生，你真係無事？真係唔駛幫你Call白車？」女職員大概奇怪我竟會問這種怪問題，所以用奇異的表情看著我。

「哦，無，無嘢呀！唔該晒你，我自己走得架啦！」我遠離了那女職員後，馬上跑到文化中心大堂！

「十一點半！仲有半個鐘！呢度係海傍，仆街，趕唔趕得切呢？」我馬上離開文化中心，向尖東方向走去！

「仆街，咁撚多人！唔該，唔該借借！唔該！」我實在不明白，為甚麼香港人就愛在這些日子走出來和別人擠在一起！

我拿出了手機：「十一點九！仲有三個字！」
我再次在人群中辛苦的穿插著！

這種人海裏加上警方實施了道路管制，本應十分鐘的路程，現在卻花了我三倍的時間！

「十一點五十六分！好，趕得切！」

我為甚麼這樣趕急？因為我記得，我……不，應該是陳天翔，就是在這天的零晨十二點，跟黃芷寧分手的！

我其實並不清楚為甚麼非要跑到現場，看自己再傷害Christy一次！
只是我的本能，在驅使著我行動！
我感到，我必需在今天見到Christy，我才有機會補救這件事！

隨著人群的歡呼聲，我知道十二點已經到來。
我加快了腳步，總算來到尖東海濱平台花園，趕得上這一幕！

「對唔住！我……一定會返嚟搵你！」

我看著眼前的陳天翔甩開黃芷寧雙手的這一幕，心裏不禁感到悲痛！
看著那無情的自己，從她身邊離開，頭也不回，仿佛沒有一絲留戀！

而Christy雙手掩面，半蹲在地上痛哭！
此刻的我，真的想上前抱著她、安慰她！

但，此刻的我，不是陳天翔，而是梁洛天！
對Christy來說，此刻的我，甚麼也不是……

我就這樣跑上前，肯定會嚇跑她……
那麼，我應該怎樣做呢？
我不顧後果的跑來這裏，卻只能站在一旁看著她！

而平台上的情侶，也因為剛才那一幕，開始在竊竊私語。
而Christy也好像察覺到其他人在談論著她，只見她深呼給了一口氣後，便抬起頭來！

她看來是強行把眼淚都止住了，只見她想站起來，卻因為半蹲時間太長，導致雙腳發麻，由半蹲的姿勢變成坐在地上！

坐在地上後，不知道是感到羞人還是分手所致，她又開始哭起來！
其他人則繼續竊竊私語，有些情侶好像想幫忙，但又不好意思走到她身邊！

到了此刻，我再也看不下去了！
我走到她身旁，伸出右手，希望把她拉起來！

「小姐，你無事呀嘛？」走近點看著Christy，只見她哭成淚人般，以奇怪的眼神看著我，大慨是奇怪為甚麼我會靠近她。

「我……我無事！」她看來對我有所戒備，看著我的手沒有任何動作！

我收回了右手，從口袋裏拿出了一包紙巾！
「我叫Henry，呢度有包紙巾，你唔介意就拎去用啦！」我向她遞上了一包紙巾。

她接過了紙巾，稍微抹掉了臉上的眼淚，然後嘗試站起來！
但她好像有點起力，站不起來。

「你唔介意嘅話，不如我幫你？」我再次伸出右手，只見她猶豫了一會，便把右手伸向我！

「唔……唔該晒你！」她站了起來，拍了拍身上的衣服，跟我道謝！

「唔……唔駛客氣！」作為一個陌生人，真的有點尷尬，不知道應對她說甚麼！

「咁……咁我走先啦！」她轉身慢慢慢的準備離開，我看著她的背影，實在很想上前安慰她。

「哎吔！好痛！」她突然叫了一聲，然後看見她的鞋跟好像斷掉了，還有點扭傷的樣子！

「小姐，你無事呀嘛？」我跑上前說。

「無……我諗無事卦！哎吔！」她勉力向前走，但看來她腳真的很痛！

「你唔介意，不如我送你去附近的士站，或者搵個地方坐下先！」我提議。

「咁……咁……唔好意思，麻煩你啦！但我唔知附近有咩餐廳……」

「唔緊要，交俾我啦！」

我扶著她，來到附近一家咖啡店！

「你坐下先，你駛唔駛飲嘢？」我問。

「我唔駛啦，唔好意思呀，麻煩到你！」

「你休息吓先！我去買杯嘢飲！」

在我買飲品期間，只見Christy脫下了高踭鞋來查看傷勢！
我隱約看到她的腳祼位置鍾了起來！

「呀……小姐，唔知你鍾唔鍾意飲朱古力，我幫你要咗杯熱朱古力！另外呢度有D冰，你敷下會好D！」我把一杯冰和口袋裏的手帕給她。

「呀，係喎，我叫Christy！唔該晒你呀，我俾返錢你啦！」她正想拿錢給我，卻被我制止了！

「唔……唔駛啦！你快D敷下隻腳先啦！」

「咁……咁好啦！呀，好痛，不過好舒服！」她用手帕把冰給包起來，再敷在腳上！

然後我們相對無言，感覺十分尷尬！

「咦？點解你唔飲嘅？你……唔鍾意飲朱古力？」她明明最愛的便是熱朱古力了！

「吓？唔係，我係鍾意飲！不過……我今日唔係太想飲者……」她說話時，眼裏好像泛起了淚光！

「哦……咁呀……咦，係呢，頭先……係咪發生咗D事？」我希望能繼續話題！

「頭先……」糟了，她又開始哭起來了！

我稍為安慰她，然後慢慢的跟她聊起天來！
她簡單地交待了她剛剛和男朋友分手了，而我也乘勢告訴她，我也剛剛和女朋友分手了，所以沒有辨法放任Christy不顧！
然後，她稍為好了點後，便先離開了！

我們雖然沒有留下任何聯絡，也沒有很深入的了解對方。
但這短暫的夜晚，已經為日後的相遇埋下了伏線！

之後的三年，我不斷的製造了很多的偶遇，而且，由於我現在的工作，經常需要聛請攝影師，所以每次有甚麼活動，我也會利用這個藉口找Christy！

而由於我對Christy的喜好十分清楚，所以我很快便和Christy變得熟稔起來！

只是，每次和她說話，我都發現她的笑容裏，帶著一絲的寂寞，我知道，這並不是她真正的笑容！

而在這三年期間，我經常有意無意間，把一些我認為可以信任，又有能力的男性帶到Christy身邊！
這便是我想到的補救方法，替Christy找到一個合她心意的人，重新給她一段全新而又美好的關係，讓她能打從心底笑出來！

可惜的是，所有對象，別說約會，連和她溝通的機會都找不到，久而久之，我也開始灰心了！
我明白，在她心裏，仍然惦掛著那個我，那個背棄了她信任的陳天翔！

我知道，再這樣下去，根本幫助不了Christy，所以在一次工作後，我單刀直入跟她說。

「Christy，你係咪仲未忘記，當日同你分手果個男人？」

她沉默了，臉上泛起了痛苦的表情，想不到，三年過去，陳天翔仍在她心裏，而且還持續影響著她！

「Henry，咁你呢？你又可以忘記當日分手嘅果個女人咩？」想不到，當日見面時，我以她為藍本，而編出來的故事，她竟然還記得。

「我？我放低咗佢啦！我依家過得好開心！」不對，我從沒有放下你。

「係咩？但係我從來無見過你追女仔喎！同埋，我見到你嘅時候，就好似照鏡一樣，見到我自己！果種失望而又惦掛的表情，跟我的是一模一樣！可能就係因為咁，我先會同你愈嚟愈熟！」這樣可不行，我可不要她帶著陳天翔這個陰影一輩子！

「Christy！你講得啱，我未放低個女仔！但至少我知道，咁樣落去唔係辨法，唔放低佢嘅話，我地呢世都唔會再有進步！我地一齊去面對佢啦！」我搭著她的肩膊說。

「面對？咁……應該點做？」Christy像被我嚇了一跳！

「我地將所有嘅回憶都拎出嚟面對佢啦！簡單講就係將所有佢同你做過嘅嘢，再做多次！我相信咁樣之後，你先可以向前邁進！」

Christy被我的發言嚇了一跳，她低頭沉思了一會後，便微笑地點了點頭！

然後，我將想法實行，一邊跟她去以往的回憶之地，將所有嘅回憶再做一次！
當中最頭痛的，便是Christy也堅持要我忘記過去，所以我也不斷創造出和虛構的那個她的各種回憶！

經過了兩年的努力，感覺Christy真的比以往開朗了！
而接下來的一個月，我跟公司請了一個長假期，為了幫助她把一個最大的回憶給消去！

「Henry，你真係陪我去台灣？」還在讀大學時，Christy跟陳天翔曾去了台灣一個月，那次是以Backpacker的形式去的，一來是為了省錢，二來是為了生活體驗！

「係呀，我講過要幫你忘記佢架嘛！放心啦，我D假多到用唔晒！」

之後，我和Christy到了台灣，我才發現到，其實開心真的未必需要用錢來堆砌，簡單的遊歷已足夠開心！
但當然，最大的原因，是陪在你身邊的，是你喜歡的人，那一切都會變得美好！

而在旅程的最後一天，跟當年一樣，我們預約了同一間民宿！

「Henry，多謝你！」

「傻嘅咩，有咩好多謝！我當嚟旅行Ja嘛！」

「經過埋今次，我諗我已經可以放低佢！」

「真係架？咁就好啦！咁你就可以重新出發啦！」聽到她這樣說，我真心的替她高興，只是，心裏又莫名的起了一絲寂寞！

「所以我先要多謝你！咁你呢，又忘記佢未呀？」

「我？啱啱忘記埋啦！」

「點解咁突然嘅？」

「因為......我頭先偷偷地睇咗佢Facebook，知道佢都重新出發，我心底都認為，咁樣係最好嘅！」對，Christy能忘掉陳天翔，這是最好的了！

「咁我地兩個咪都可以重新出發囉？好嘢，飲杯！」

這晚，我和Christy喝了很多，談了很久！
為這最後一晚而高興著！
而我，亦準備在這一晚後，慢慢的從Christy身邊離開，她已忘掉了陳天翔！
她的世界，並不需要多一個梁洛天存在，離開她才是最好的選擇。

夜幕低垂，在我們睡覺的期間，我突然清醒了！
我看著窗外的月亮，很漂亮，真的很漂亮，能和Christy渡過最後一夜，也算是幸褔的結局吧！

我背後傳來Christy的聲音。
「Henry，你係咪醒咗呀？」

我不敢回答，我現在只希望Christy得以重生！
突然，我感到自己的腰部，被Christy抱著，而且抱得十分的緊！

「Henry，我地都忘記咗曾經對我地係好重要嘅人，可以重新出發！但係，呢一切都係因為你喺我身邊！你……唔會好似果個人咁，喺我面前消失架啊？」

她的話音剛落，我感到她在我背後顫抖著，她是在哭嗎？
我轉過身來看著她：「Christy，你做咩喊呀？無事呀嘛？」

她搖了搖頭，仍然哭著說：「你係咪之後打算離開我？」

「你講咩呀，點解你會咁諗？」我隨便敷衍了事！

「你唔好呃我……我知……我知你都打算離開我……」她哭得更厲害了，這是女人的直覺嗎？

「唔係呀Christy，我唔係打算離開你！」我很想抱緊她，但……我不知道自己有否這個資格！

「真係咁咩？唔知點解，由第一日見到你開始，我就覺得你同佢好似！似到一個地步，無論語氣，小動作，飲食習慣，都同佢好似！而你今晚，亦都俾到當日，佢同我分手果陣嘅果種感覺！我就知道，你會離開我！」

「Christy……」我已不知道應該說些甚麼了！

如果，我以梁洛天的身份，去代替陳天翔，這……可能嗎？
我有信心能給她幸褔嗎？我有資格去給她幸褔嗎？

我稍為推開了Christy：「Christy，我……」

我還沒有來得及說話，她的唇已貼上了我的唇！
這觸感，是Christy！
這體溫，是Christy！
這香味，是Christy！

我不知道這吻維持了多久？
但當我倆的唇分開後，換來的，是更強烈的吻！
這夜，跟當年一樣，我和Christy發生了關係！

之後回到香港，我和她拍了一年拖後，便結婚了！
兩年後，她和我的愛情結晶品出世了！
我們三人，就這樣住著普通的房子，過著普通的生活，十分開心！

只是，偶爾我會發現，Christy有意無意間，也會提起重生前的我 ── 陳天翔！
在她心裏某處，仍然殘留著那個我，雖然只是很少部份，但她沒有完全忘記！

而我也沒有放在心上，因為不管是陳天翔還是梁洛天，不論哪個也是我！
所以我沒有太過在意，只是開心的過活著！

而神曾經提到過的任務，我早已拋諸腦後，忘得一乾二淨了！
但想不到，在我們最高興的時間，竟發生了這件事！

就在迎來2016年的12月24日，我竟然忘掉了這可惡的日子！
這天，Christy由於接了一個工作，故晚上才可以一起慶祝！
她在完成了工作後，她趕快的坐上了車子，希望盡快跟我們會合！

可是，亦因為這樣，她發生了交通意外！
我趕到醫院時，發現她已在深切治療部裏！
我帶著兒子，趕到來醫院！

「醫生，我係佢老公！我想問佢情況係點？」

「可以做嘅我地都做咗，接落嚟，就要睇佢嘅生存意志啦！」

我跪在地上痛哭著！我不明白，為甚麼神要給我一個重生機會，但又要再一次奪走我的希望！

「陳天翔！呀，唔係……應該係梁洛天先啱！」一把熟悉的聲音在我面前出現，我抬頭一看，那全身白色的打扮，是神！

「係你？太好啦！求下你快D救返Christy啦！」我跪在地上對他說。

「你會唔會太貪心呀，我已經俾咗機會你重生，你依家又想救埋佢？」神不滿地說。

「咁……咁……咁係你俾機會我重生架嘛！你依家又將我嘅嘢拎走，咁做又有咩意義？我生存仲有咩意義？」我抱頭痛哭。

「唉，你冷靜D先啦！你知唔知點解當初你會有機會重生？」我搖了搖頭。

「當初，係因為黃芷寧，佢就算遇到車禍，瀕臨死亡，你知唔知佢當時係諗住D咩？」

「佢……佢唔通係……」我恍然大悟！

「無錯，同你諗嘅一樣，佢所有嘅思緒都係關於你！佢當時強烈嘅思念，引起咗我嘅興趣！我當時俾咗個機會佢，我將陳天翔，亦即係當時嘅你情況，話咗俾佢知！我要佢選擇，係俾機會你重生，定係佢自己復活！當時佢毫不猶豫揀咗俾你重生！於是我就去咗俾呢個重生嘅機會你！」

「點解……點解佢要咁傻？」

「而當日我俾你最後嘅任務，就係將佢心目中嘅陳天翔徹底消滅！呢個就係所謂隱藏任務，你覺得你有無完成到？」

「呢……呢層……」老實說，我實在不敢說她已完全忘掉陳天翔！

「答唔出？其實……原本你做到嘅話，我就可以無條件救返佢！只係……依家咁嘅情況……」

「求下你！你一定要救返佢！」

「我講過啦，如果你係達成條件，我自然會救返佢，但係依家……」

「我願意用我條命救返佢！同埋……同埋佢心入面仲有陳天翔嘅話，我希望你復活埋佢，等佢地可以喺返埋一齊！」我打斷了衪的說話，誠懇地說。

「你……真係願意為佢而犧牲自己？」神有點驚訝地說。

「係……既然我以梁洛天嘅身份同佢喺埋一齊，但都取代唔到陳天翔，咁陳天翔喺佢心目中的確係無可取替！我相信，如果佢地喺返埋一齊，佢地會有更好嘅結果！」這樣說其實有點奇怪，畢竟兩個也是我來的，但……沒有關係了！總之Christy幸福就好！

「你真係諗清楚？」神再確定我的意志，我沒有一絲猶豫，肯定的點頭！

「咁我跟返規則去做啦！」神用拐杖在地上敲了三下，我便昏倒了！

「梁生！梁生！你無事呀嘛？」這對白怎麼這樣熟悉？

我睜開雙眼，一個穿著白袍的護士看著我！

「咦？呢度咩地方？點解我喺度嘅？我無死到咩？」我驚訝地問。

「呢度係醫院，啱啱你係深切治療部暈咗，我地扶咗你嚟休息！」

「咁……我老婆呢？佢無事呀嘛？佢唔可以有事架！」我激動地說，難道神沒有遵守諾言？

「梁太佢……」我不待她說完，便馬上跑離了休息室，向深切治療部跑去，正想推門進去時，卻被職員阻止了！

「先生，你唔可以隨便入去架！先生你再係咁，我地就報警架啦！」

「我老婆喺入面，你俾我見佢啦！老婆！老婆呀！」我擺脫不了他們，只好跪在地上痛哭！

「老公，你係度做咩呀？」一把熟悉而又溫暖的聲音傳來，是Christy，只見她雖然坐在輪椅上，但身體看來沒有問題。

「老婆！阿仔！點解……點解會咁嘅？」我帶著淚水高興地笑著！

「阿仔你去同姑娘度先啦，媽咪同爸爸有D嘢講！」

「老婆！老婆！」我衝上前抱著她不放。

「你冷靜D先！我無事呀！我無事呀！」她拍了拍我的背，安慰我說。

「但係你對腳……你放心，我會永遠照顧你！」我堅定地說。

「我對腳無事呀，輪椅係因為我太虛弱，所以先要用Ja！估唔到你變咗個普通白領，都仲係咁傻！」

「吓？你……你講咩呀？」我不會是聽錯了吧？

「我話，我估唔到自己會俾你追到兩次，仲要兩次都係全心全意咁鍾意咗你！」

「點解你會……」

「其實頭先我發咗個夢，夢入面有個白衣伯伯，佢同我講咗好多嘢！唔係，應該係所有嘢！之後佢就同我講返，今次輪到你想犧牲自己去救我！跟住佢就話我地兩個麻鬼煩，一早拋開心入面嘅迷惑，根本就可以係埋一齊！所以佢話唔想再修改D咩過去，就俾我地兩個都復活喎！同埋，佢仲話，如果唔係我地兩個都有犧牲嘅精神，係唔會引發到呢個奇跡！」

「咁……咁即係……」

「咁即係話，我地全部都無事，可以開心咁過聖誕啦！」

我緊抱著她不放！
「我愛你！我唔會再俾機會你離開我！」

故事來到這裏，可算是完結了！
那麼，陳天翔最後怎樣呢？
我和Christy再查證後，發現根本沒有陳天翔這個人！

究竟，是因為記憶混亂，我們才發了這場夢？
還是說，這真的是聖誕節引發的奇蹟呢？

不管怎樣，我和Christy能夠幸褔快樂的生活下去，這才是最重要的！
我們雖然沒有金錢、沒有地位、沒有奢華的生活！
但……我相信，快樂不需要過多的東西或用金錢去堆砌！
而只需要一顆真心，便能享受到最快樂的事情了！

聖誕雖然已經過去，但快樂卻是一輩子的！
祝願大家都有個順順利利，美滿快樂的將來！

想睇筆者嘅其它作品，歡迎到筆者facebook：https://www.facebook.com/insidemyheart2015/

其它長篇故事，可於紙言收看：https://www.shikoto.com/author/18352/心層次.html