上集：https://post.shikoto.com/posts/110351-為咗係四季擺酒，我睇住老婆嫁比第二個男人（上）

好快，去到結婚果一日。
去到門口，比個濃妝姐妹截住：「你係咪忘記咗D野？」
佢指一指枱上嘅利是封。
人情？我去我老婆嘅婚禮仲要比人情？
「唔記得帶嘅話，有得碌卡。」
門口D賓客齊齊望住我，好似話，呢個窮鬼係咪想白食？
我忍痛拎張卡出黎，係上面㩒咗1000，仲未㩒enter，
個姐妹大叫：「嘩，一千？呢度四季黎㗎，起碼都二千啦。」假眼睫毛都差D飛出黎。
結果，你地估到啦。我係咁有骨氣，我就唔會係呢個婚禮。

阿怡幫我安排咗偏遠嘅一圍，由三唔識七嘅朋友組成。
無耐就播成長片段，初初係「新人」嘅單人照，然後係結婚相，我同阿怡嘅結婚相，
除咗我之外，無人發現，相中人同台上嘅新郎係兩個人，大家都只關心乳豬幾時上。

新人進場，起哄，又係一數到十嘅世紀之吻。
果一下，我捏住隻酒杯，成手青筋，但我無勇氣亦無力氣捏爆佢。

「你係新娘個老公？」隔離個女人望住我。「我係新郎個老婆，你真係大方。」
終於上菜，我沉默地望住隻乳豬，
個女人繼續唔停口：「我老公話唔擺四季，阿媽就唔比佢結婚，我又無錢......」
同枱嘅賓客開始望住我地，令我無限尷尬，好彩鮑魚上咗，吸引晒佢地嘅目光。
我岩岩夾咗舊鮑魚，佢突然笑住講：「我終於見到有人折墮過我，你就比晒成副身家，買頂綠帽黎戴。」

果一下，我終於爆發，企起身拍枱大叫：「八婆，積下口德啦！」
佢都企起身，迅雷不及掩耳間，成杯紅酒淋落我頭上。
四季D紅酒係咪特別好飲？
我唔知，我只係覺得好濕，有D凍。
然後佢蹲係地下喊，全場都用譴責嘅目光望住我，有無搞錯？你淋我，之後你喊？
好快，我地比保安請咗出去。

我比晒成副身家黎擺酒，連鮑魚都食唔到。

不過，比冷風一吹，成個人清醒晒，
我擔心嘅係，我破壞咗阿怡個婚禮，佢仲肯唔肯做我老婆？
「無野啊，你地比人趕走後，婚禮照常進行。」
「阿怡，你唔嬲我？」
「我想係四季擺酒，願望實現咗。至於婚禮上發生咩事，邊個會記得，大家都只記得個排場。結婚，就係結排場。」

我以為故事已經完，從此公主同奴隸會開開心心咁生活落去。
點知，一年後，阿怡計劃生小朋友，
「一歲就要參加playgroup，仲要學法文英文鋼琴小提琴奧數......每年預四十萬就差唔多。」
「吓，我唔食唔著都無咁多。」
「我唔理，總之我個仔一定要贏在起跑線！」

無幾耐，我就接到一個電話：
「我地有個新客叫吳生，好有錢架，一直想生個仔，但佢太太不孕。
吳生肯出晒個仔嘅教育費用，不如叫佢同你老婆『拼一拼』。」
「......點樣拼？」

－完－