是咁的。

有一日，有個朋友用Wtsapp SD左Cover picture 張圖比我，我打開後第一時間就諗返起一個童年回憶。

係啊，無錯啊，我諗你地入黎都係因為呢張圖，可想而知，你地個歲數應該都……轉個講法，你地都要幸慶細過果陣仲生活係一個有童年既時代。

張圖應該好多人一睇就有聲，我都唔賣關子，當我一睇到張圖後，會心微笑左一下後，心入面默念：

大笨象，揸支槍，去打仗，打唔贏，返嚟食碗辣椒醬……

睇到張圖，所有童年回憶返晒黎，但係再諗深一層，而家D 細路仔，會唔會有D更Update 既版本，又或者，佢地腦入面只係得返洗腦既課程。

其實近排我睇好多野都講緊而家D小朋友既生活，好多佢地既上一代，姐係我呢一代，都會話，佢地既童年已經少之又少。你地試諗下，我地既上一代係我地細過果陣，講得最多既說話就係：「你睇而家你地不知幾幸福，我地果陣邊有呢D野……」呢句係未似曾相識呢。

但到我地呢一代人，又會點話而家D細路？既嘆佢地？擔心佢地？定係你地都唔敢想像佢地會身處係咩野情況？

上星期我去我一位朋友既婚宴，佢安排我坐左係一班姊妹團度，唔好妒忌，我無刻意叫我朋友咁做。而當中有一個姊妹係小學教師，係傾開計期間，佢話而家小學五年級要學中史，秦始皇講起，一頁一個朝代。

我聽到後心諗，我果個年代中一先開始讀中史，係一課課分一個朝代，你地而家要一班小學生上中史堂，仲要一頁雞精版！我真係好想知道一頁紙點講一個朝代既野。當然我未知佢既說話真實成份有幾多，但係而家小朋友既課程比起我地果陣真係難左好多。有時我去書局睇書，無聊走去小學教科書果度拎本黎睇，愈睇愈學得自己以前有無讀過小學，點解D字好似深左咁多既。

難怪而家D小朋友要補習……

上堂已經要學咁多野，放左學未可以放鬆下囉……你以為，你知而家D家長幾鐘意安排自己D仔女去學呢樣做果樣，點解要咁做？因為環境下迫成咁。以前，我地點會日日比家長安排咁多「節目」，都係返到屋企做功課，做完功課先開部電視睇卡通。甚至D老師都會話好好珍惜仲係學校既時光，出到黎做野有好多競爭，好難會有讀書果陣時咁開心。

但係點解我地好似將呢句說話既時間線推前左咁，搞到而家D小朋友都要面對住呢D應該將來先要面對既競爭。而且，其實佢地自己都唔知爭D咩，可能只係知道佢地咁做，佢地爸爸媽媽會開心。

提到功課同卡通片，你地細個有幾多日係一路睇一路做功課？事先聲明，我好乖我係睇完先做，而且我做功課既衝勁，係因為知道要做完功課先可以睇卡通片，先會做得咁快。我記得果陣最開心既，係扭開部電視，睇「閃電傳真機」既日子。

係啊，無錯，我果陣仲有「閃電傳真機」睇。

佢地D卡通，其實而家諗返起都唔會記得有咩劇情，但係童真就係咁，只要睇得開心，我果時咁細點會理佢地有咩劇情。相反地，果D兒歌我到而家都仲記得。有幾多過睇緊篇野既人細過係有兒歌陪伴既請舉手！！！

果陣可以話係兒歌最輝煌既時代，但係當有一年，我打開部電視，暑假最後一日，通常例牌都係兒歌金曲頒獎典禮。每年我都會映求我媽媽比我睇晒先訓。

但果一年，無，取消左。

以前D兒歌真係百聽不厭，就算到而家我時不時都會上網搵返黎聽，但當我聽返而家果D卡通片D歌……佢地唱緊咩啊究竟……

「你睇你地而家幾幸福。」我以前真係成日聽，但係而家D小朋友，聽得最多果句係D咩？
爸爸媽媽幫你報呢個課程好唔好啊？快D做完學校D功課再做埋本練習？夠鐘上小提琴班拿，行快D咩？

咁我地成日聽果句呢？點解唔見左？定係，我地跟本唔知道咩野先係幸福？又或係我地唔敢再想將來……

將來既佢地會係點呢？會唔會係咁呢……

一日到黑都只係對住手上部電話或者部Pad，唔講野，剩係識Message，眼聽手講。見工果陣個個都識鋼琴同小提琴等呢D同份工無關係既技能。問佢地創意係D咩？佢地可能笑笑口話學校無教，當面試要測驗，比左呢篇野張Cover picture，叫佢寫返段中文出黎時，唔識寫，因為佢地無聽過咩係「大笨象，揸支槍，去打仗，打唔贏，返嚟食碗辣椒醬……」

可能佢地會問，點解大笨象要揸住支槍去打仗，佢咁大份撞都撞死你啦，但係又竟然打輸，但輸既懲罰竟然係食碗辣椒醬。

我地成日都話而家科技發達，進步得好緊要，但其實係唔係因為我地自己退步緊，先顯得科技既突飛猛進？諗返以前，阿爸阿媽無而家D社交平台，都一樣拍到拖，都可以諗到好多節目。以前朋友見面，大家約好左時間地點就準時見，而家我地方便左咁多反宜約唔到。以前D細佬仔手上面拎住一個公仔就可以玩餐飽，而家D細佬拎住部裝左好多game 既手機都可以不停咁問你仲有咩野玩……

係未，我地得到左科技，但無左純真。

你地屋企仲有無一件以前既玩具係度？暴龍機？芭比？就算最簡單既鬥獸棋？你地會唔會想拎返出黎，玩多次？

－－－－－－－－－－－－－－－－－－－－－－－－－
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus