收兵,唔係女人嘅專利。要講收兵大師,一定要提楊過。

咦?楊過唔係有小龍女,好專一?

難就難在,佢明明有一隊女兵,依然被視為專一嘅象徵。到底有咩兵法?

1 講明有心上人
對住每一個女角,楊過都會講明有幾愛小龍女,塑造深情形象。

之後無論佢對班女兵做幾多曖昧野,女兵都唔敢奢望升職做將軍。

當女兵發現自己墮入情網,甚至會怪責自己:男神早就講咗,佢同小龍女係一對架嘛,係我唔岩。

2 唔主動要求
楊過唔會主動要求「你幫我做xxx」,咁就有利用觀音兵嘅嫌疑。

佢只會不斷講佢嘅願望,但唔要求你幫忙,結果你主動幫咗,佢感激感動感慨,然後繼續同心上人一齊。公孫綠萼就係咁死。

咩啫,我又無叫你犧牲,條路你自己揀。

3 為每隻兵留下深刻回憶

話明係收兵,無可能係兵身上花咁多時間。
楊過就為每隻兵都做一件事,係好感動嘅,例如救陸無雙,幫郭襄慶祝生日。

當隻兵被冷落被離棄果陣,都會諗番起美好回憶:其實佢都對我好好,值得繼續服役。

4 唔執着於失敗投資

無論幾有魅力,都無可能令所有兵終身服役。

楊過幫咗完顏萍,展現男神魅力,點知完顏萍無「一見楊過誤終身」,另嫁他人。

咁點算?楊過好明白,收兵本來就係分散投資,與其花時間糾結,不如收多兩隻新兵。
  
不過,到最後,搵番你嘅小龍女,就唔好再收兵了。

真正嘅幸福,再多觀音兵都代替唔到。

FB: www.facebook.com/tomato0728chan