是咁的。

首先要澄清呢篇文章係絕對無性別歧視，我亦都唔知入黎睇既人男多定女多？好有可能D 女仔睇到個Tilte 已經嬲嬲豬唔入黎睇……

但我可以解釋，因為就本人覺得，反白眼呢個動作，女性做係會比較好睇，但男性做就會好怪。唔信，你先試下叫你身邊既男性朋友做一次反白眼，你就會體會到。

唔好問我點解會係咁，我自己係男性我都好想知道點解。你地而家知唔知啊，就係因為咁，反白眼整到好似變左係女性既專屬技能。

我身邊就識好幾位朋友都會成日反白眼，今日我就同大家探討下「反白眼」！！！

你啊，未反白眼啊，好好地咁正眼睇晒成篇野先再慢慢反。

亦麻煩紙言如果Share 篇文去 Facebook 度係到就Cut 文，謝謝。

講到明話探討，第一樣要做既當然係講下係咩野情況下佢地會反白眼。通常，都係當佢地聽到一D 令佢地無奈，啞言，唔想再為無聊對話作出回應既情況下都會反白眼。

係啊，佢地反白眼既行為，就好似變成反射動作一樣，咩野係反射動作？就好似呼吸咁，你唔駛好刻意去做，反射動作自然就會呼吸。佢地反白眼既行為都係一樣，甚至演變到唔反白眼就唔識回話添。

真架！我講既係真架！你唔信下次你對住呢D 朋友果陣，叫佢望實你唔好四圍望，然後開始同佢對話，你就會見到得你係度講，佢一句都搭唔到咀，甚至當你講D 挑佢機既說話時，佢因為反唔到白眼仲會笑添啊！

好恐怖……我地人類點會估到，有朝一日，竟然會係隻眼控制把口講野！

究竟呢個係人類既進化，定係退化就不得而知拿。

睇到呢度，有幾多人已經反過白眼！唔該同我Share 篇野去Facebook！

講完邊個情況下佢地會反白眼，而家就講下反白眼既招數……咩話！？反白眼都有招！？咁眼有一雙，點都會有分反左反右一齊反掛。但我當然無咁低質啦，而且其實剩係反左或反右都幾難……

好，咁係咩招數呢？已我見過身邊朋友反過咁多次眼既心得，我會分成「明反」，「暗反」，「不協調反」以及「反唔返落黎」。

「明反」呢個真好簡單啦，就係果個人當住你面前就反你，呢一招對於說話侮辱簡直係反眼之最，就等同一架重型貨車直擊正面一樣。

跟住就係「暗反」，你地睇到呢個字，可能會話都講明話係暗，點會知道啊。但少年你們真的太年輕了，好多講得出呢句既人，慢慢回憶下，有無記得有幾次發現朋友反你眼時，其實佢已經將塊臉擰緊去另一邊？

無錯！「暗反」者，實會比人捉到，點解？因為通常反眼呢個動作一定會快個擰塊臉去另一邊呢個動作。所以好多人都會係用「暗反」出招既人擰塊面既中途，就發現在其實係度反緊眼。呢一招說話侮辱傷害較低，而且會造成出招者進入尷尬狀態，所以要小心。

然後就係「不協調反」，咩野係「不協調反」呢，其實呢一招係當一個人聽到極度唔岩聽，或極度無聊既說話果陣，太過用力出「明反」而演變出黎。你可能會問，你剛剛先話佢地反眼反到變成反射動作，咁做駛用力去出招？無錯，你地已經突破盲點，就好似剛剛咁講，呼吸都係一個反射動作，如果你地刻意用力呼吸，都有可能嗆到啦。

所以當「明反」一用力，就會令左右眼同步率下降，甚至變到震住咁反，呢一招其實好傷眼，所以反慣眼或者反眼新手要記住反眼時唔好用力。

「反唔返落黎」，你地唔好睇呢個字好似好勁，實則只係「明反」同「暗反」既加強版，只係當眼珠反到臨界點個位後停留既時間耐左D，呢一招係說話侮辱中既侮辱！！！

講左反眼咁耐，係時侯講下反眼既人要有咩野資格……係啊，無錯，唔係人人都反得眼架，就好似我咁，我就唔係一個反眼既材料。點解咁話，因為上天係我自出娘胎果陣就廢左我武功。

我對眼，細到好似條線咁……我D 朋友成日都會笑我，我張開眼睛同閉上眼睛應該差唔多。不過我份人講得笑，有時我仲會加把口，「係啊，所以我眨眼既距離較短，可以慳返好多時間。」

仲有，就好似我一開始所講，反眼既人大多數係女性，我試過係Google 上面打「反眼」然後 Search 圖片，出黎果D 大部份都係女性，而當一見到有男性反白眼既相，就會當堂打個冷震，覺得好樣衰。

咁證明左D 咩？唔係證明反白眼真係女性既專屬扳技能，而係我地已經習慣左女性係我地面前反白眼。因為佢地成日反，日見夜見真係好易習慣。相反，男性有幾何反白眼，兩三日都應該無一次，所以點解次次睇到男性反白眼會樣衰過女性反白眼，就係因為呢個原因。

但其實當一個人，可以係另一個人面前反白眼，都代表住佢地之間其實無咩隔幕……除非佢係擺到明唔妥你。而其實有呢種人係朋友圈度都唔係一件壞事，因為你永遠都可以知道幾時講野會令到人無奈，幾時講既說話會令到人發癲。

所以要好好珍惜你地身邊，一個咁真誠而又成日對你反白眼既人啊。

個尾得講返咁多好話，「妳」未反白眼啊。

－－－－－－－－－－－－－－－－－－－－－－－－－
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus