有時候，和稔熟的朋友會交流不少工作上的煩惱，尤其是大家都是做服務業的，很多時會互相訴苦，遇上怎樣的無賴客人。我朋友是旅行社領隊，她告訴我，原來有許多無品的客人，會借意不付服務費。

「曾經有一次，帶團去泰國，有個客去到就不停食街邊嘢。點知半夜三更，打電話比我，話又痾又嘔，我即刻陪佢去醫院啦，原來佢急性腸胃炎。好啦，醫院距離酒店好遠，陪佢去醫院，一來一回，成晚無訓過，第二朝一早又去帶團。」

「咁攰？咁佢之後嗰幾日點啊？」

「咪要留係酒店休息囉！無得玩㗎啦！」

「咁佢都幾陰公。」

「我仲陰公啊！佢竟然最後一日唔比服務費！」

「吓？點解啊！你照顧佢，唔係應該比多啲貼士㗎咩？」

「你估個個咁有良心咩。佢唔單止多謝都無句，仲話嗰幾日都無玩過，比咩服務費啊。頂佢個肺，嗰幾日我仲買粥比佢食，連粥錢都蝕埋！我唔想再遇到啲咁無品嘅客啦！」

原來天下無品的客人，皆一樣討厭！為拿著數又無品的客人，更是可憎！

有一次，櫃檯有個男人不停拍檯，鬧起上來，如上了膛的機關槍：「X你老母X，正豬X，咁X蠢！做少少嘢都唔X掂！」

你以為幾句粗口就會拋窒見慣大風浪的同事？這就大錯特錯了，作為前線人員，傻佬癲婆我們見識不少，動怒動粗繼而動武只會反映個人人格水平。只見櫃員Ernest面無表情冷靜地回答：「唔好意思，先生，因為呢筆錢唔係新資金，唔可以享有優惠利率。」

「你老母X，唔可以？你琴日又唔X話我知？我入錢落佢戶口就係做定期，問X咗你，你又話得！」

「係啊！你明明話得㗎！宜家又反口！」男人的太太在旁幫忙吶喊助威。果真是兩公婆，同聲同氣，如果換著是我，反而會拉走老公，免得失禮。

「琴日你係問我可唔可以轉錢去太太戶口做定期，呢個動作係可以嘅。至於先生筆錢，一直存喺本行，定期剛剛夠期而轉去太太戶口，唔算係新資金，因為要由其他銀行存入的錢才算是新資金。銀行規定新資金先享有優惠利率。」

「咁我今日拿走，聽日入返又得唔得啊？」太太挑釁地問。

「唔好意思，新資金是要在一個月內有存款增長先算。或者你過咗一個月再嚟做定期就可享優惠利率。」向來EQ高的Ernest開始有少少黑面。

「咁你老母X即係誤導啫！你咁X豬㗎！你做咩唔教我搬走啲錢再嚟啊？」男人邊說邊憤怒地拍檯，「我唔想再同你條八婆講，我要見你哋經理！」

隨即Ernest請了OM (Operation Manager) Billy出來幫忙招架這對無賴夫婦，兩夫婦見到一位男性經理出現，當堂變得客氣些少，屬典型的見高拜，見低踩。

「我要投訴呢個XX職員！佢誤導我哋⋯⋯」於是，先生把剛才的理據再覆述一遍。

「先生，首先請你注意你的用語，尊重同事。另外，我哋有責任保障銀行利益，唔鼓勵客戶搬錢走，所以職員唔會主動提示或者教導你點樣搬錢走⋯⋯」Billy邊說邊著Ernest返回辦公室內，免得Ernest繼續被人指罵。

那對夫婦當然不肯罷休，繼續無理取鬧，不是說職員誤導，就是說態度惡劣，站著邊罵邊拍檯，還說不但會寫信投訴，更要脅我們會去信報館投訴，看來不拿一點著數走便勢不離開。

最後，為了息事寧人，我們還是出了送客法寶——coupon。雖然這個作法是極度不願意、不鼓勵的，但有時候是沒辦法中的辦法，希望錢能解決的問題，就不再是問題。

「我哋大X把錢，聽日咪再喺第二度搬錢入嚟囉！」先生離開時嘴上是這樣叫囂著，之後一直再也不見他們的蹤影。常言道得理尚且饒人，他們縱然理虧，嘴上卻是半點不饒人。

其實作為服務業一員，大家每日的相同盼望，就是不要遇上無品的客人。