筆者往日經常聽到兩種截然不同既論調：一種話毒男要有自信，另一種係毒男最忌有自信。
真係人都顛。聽邊個話好呢？

再仔細少少探討兩者既論點，會發現，實際上兩者既邏輯係，毒男有左自信，慢慢就會唔係毒男。而怕醜既人覺得，身為毒男而有自信咪盞出醜。
好啦，理論無人鍾意聽，包括筆者在內。所以我地黎聽故事。

筆者係高中時代都相當無自信。
校服遮掩住我至今仍無可救藥既衣著品味，但遮掩唔到若隱若現既老泥漬同身上既臭味。
我相當有信心，如果我趴低詐死，好快就會有禿鷺擔走我條屍。
唔執執先出門無非係懶，而且覺得邊有人得閒睇我。

不過我只會係屋企咁老定。一出門口，即刻覺得四周既視線如同監視器既紅外線，無跡可尋，又無處不在。

我曾經以為，以上一切得到改善就會得到自信。
咁不如一切都等改善左先做。比如發奮，又比如溝女。
然而20歲唔會做既事，30歲都唔會做。時機係客觀因素，而動機係主觀因素。

最終我帶住一張失敗既成績表離開學校，身邊亦都無女陪伴。（當時仲未同阿魚見面。）
自信當然更差。公開試後四五年內，我每次答人考成點，都會將自己成績全部吹高一個Grade，然後話中文2先係我入唔到八大既理由。
同時亦好為人師，憑住多少睇過D戀愛議論文，係網上大放厥詞。
好長一段時間，我都唔知點樣客觀評價自己。前一秒覺得自己溫多兩錢書可以入神科，下一秒連成績表都唔敢揭開。

認識到人其實唔需要靠任何外在條件，仍然能昂然站立既時候，已經多年過去。

企係女仔面前，唔再時刻考慮點樣先唔會令人反感，都唔再知之甚少而言之鑿鑿。

姑且將自己曾經無自信既原因總結。
將失敗可能性無限放大，無法客觀審視自己。
就好似答一份卷，唔係憑過往經驗估算成績，而係考完先黎煩惱有無寫名，有無去錯考場，直接當自己係零。

毒男係一副優質擋箭牌。一切失敗，都可以歸咎為自己係毒男。
然而係保護傘下太耐，就唔會識得憑自己為它人遮風擋雨。
如果你想擺脫毒男身份，不妨簡單問自己，一直以黎缺乏自信既理由是否成立。
假如毒男身份令你好舒服，為一事無成搵到個借口，勸你都係唔好有自信，因為你已經無能力面對外界。

生而為人，不必抱歉。
終日幻想春風拂面，四野流芳，然而打開門窗，夜空下皚皚白雪。
風消雪融，幽谷靜夜，隱隱見無盡藍天。