最近看新聞才知道「傑青」的最新定義，如果按這定義，我想，不少銀行同業能夠躋身這一殊榮。港媽問小妹，點解唔去做那類理財顧問？嘿，如果我願意，早就入行了，反正人各有志，身在行內，更明白去到某些位置，要付出什麼。今日就同大家分享一下，小妹曾經在分行被挖角的經歷。

每日開戶口，循例都要做下KYC（Know Your Client）。

我第一次遇到比我更多問題，比我更懶friendly嘅客。

「我係某某保險公司做高級理財顧問㗎！」我正在幫這位小姐填開戶資料。

「你平時忙唔忙呀？喺咪要成日OT呀？」咦？同人扮熟明明係我嘅工作，小姐你做咩搶晒我啲對白呀？

「做我呢行好flexible，有好多自由時間。」我知，所以得閒到嚟同我吹水？

「你啱啱畢業？做咗幾耐呀？」咦？點解變咗我被人做KYC嘅？

問多兩問，佢見我好似幾nice，開始入正題啦。

「呀，我好奇一問，你哋sell保險，收幾多%佣呀？」這位小姐壓低聲線，懶熟咁問我。

騙徒的手法真是層出不窮，當大家以為佢只是想攞料，就錯了。

「你哋target係咪好大？其實就算賣同一隻產品，我哋收嘅佣金高你哋好多倍。我諗你都聽過MDRT(百萬圓桌會)啦，我條team入面大部分人都係MDRT，講真，要月入四五萬，你喺銀行要做幾多年先有？」

「如果你夠勤力，做到COT(Court of Table)，一個月搵十幾廿萬絕對無問題！」

可能你會問我既然做銀行都要銷售產品，點解唔去做理財顧問呢？賺得多啲喎！

請容許我反問一句，客戶從何而來？做銀行有客盤，而那些顧問又有無呢？撇除那些有uncle auntie關照的世姪，平凡如小妹，人脈就只有身邊的一班朋友。有人會話，那些避開我嘅就唔係真正朋友，咁睇嚟你好有潛質做「傑青」，因為你哋對朋友嘅定義如出一轍！

見利誘唔得，這位小姐出絕招：構建理想藍圖，嘗試講中對方心中的願景，再構造一個烏托邦出來。簡單一句，就是給對方一個希望。對初出茅廬的畢業生而言，還有什麼比擁有良好的仕途更吸引？

「你想唔想挑戰自己，有自己嘅事業？我唔知你哋銀行升得快唔快，但如果你夠努力，我相信你喺我哋呢一行好快可以有自己條team。」你實在太睇得起在下，小妹只是一名混進銀行呃飯食嘅90後廢青，從未想過有咩大建樹，你都是過主吧啦。

「你真係唔想有突破？」小姐，你係想收我做下線咋？睇嚟係你需要突破你條team嘅人數多啲喎！

「如果你有興趣向呢行發展，我可以約個時間同你傾下。」這位小姐最後留下她的卡片，滿臉笑容地離開。

我們的選擇，決定了我們是什麼樣的人。

我見到好多同行分享我的文章，其中一個留言令我動容，大致意思是盡自己能力，讓銷售建基於良心。我每日都提醒自己，工作的意義，希望能夠盡一己之力，憑良心做事。我不是指那位小姐沒有良心，只是大家的價值觀不一。錢，很重要，但真的不是我first priority。

“Cleverness is a gift, kindness is a choice. And will you take pride in your gifts or pride in your choices？”——亞馬遜創辦人Jeff Bezos

善良是一種選擇，比起搵錢至上的聰明仔，我更欣賞選擇善良的人。