【旅行是愛情的修煉場(上)】

剛過去既一個幾星期我同麥仔去左旅行
慶祝我地被失業同時慶祝我地一齊兩週年了。
我地兩年來已經去左五次旅行,
但每一次都是一種練習,每次都學習緊去相處

情侶去旅行就係焗住大家幾日幾夜,每日24小時形影不離
大家既缺點就好似放大鏡咁無限放大
加上一齊住一齊用錢,是實實在在面對生活,不再羅蔓蒂克
所以我覺得結婚同居之前,不如多去幾次長既旅行
睇清對方之餘,都睇清下自己頂唔頂得蒲對方

平時兩個人出街,其實無咩太多生活方式既磨合
但去到一齊住幾日,就是面對生活習慣衝擊既開始
由細到大,爸爸媽媽都好隨性,而且我又是港女好少做家務
相反,麥仔是個有潔癖有規律同做家務能手,
因為去旅行「一齊住」,呢個生活方式完全不一樣就顯露無遺

頭一兩次真係會感到好衝擊
我發現原來麥仔對於生活細節好在意,而且對於住處既潔淨要求好高

相信我,同有潔癖既人一齊真係好大心理壓力
訓覺前如果掂完燈制掂任何野都被勒令要去洗手先可以上床(上張床訓覺呀),
未沖涼真係唔好周圍坐,沖完涼唔好坐未沖涼坐過既地方
張檯唔好太亂,野唔好周圍擺,balalalalalalala等等等等
一開始我會覺得做人何必咁辛苦,我已經好眼訓又要去洗手
我唔覺得自己對手污糟咪得囉,係咪先哈姆太郎?

到後來我發現潔癖係可以潛移默化,
慢慢地我好像被傳染了潔癖,雖然永遠都追不上麥仔既程度
我開始不自覺妥協了去洗洗手,懶惰既時候就索性耍無賴
比麥仔更早訓落床然後話 我訓左啦您去熄燈您去洗手啦拜拜。
而麥仔有時都會妥協,有時我真的好累佢都由得我「污糟」一次

尤其我地好鍾意book airbnb,
而且一去旅行又最少去一個星期,

於是有機會面對洗衫清潔執屋呢啲接近同居既細節
上面都話我係家務白痴,麥仔係家務能手
我地完全表現到新時代男女角色開始調轉既現象
開頭兩次去旅行我真係覺得自己係廢柴,男人都叻過我
我懷疑緊我係咪公主病太深,麥仔會不會因此唔娶我
不過好彩麥仔會自己密密去做,咁當然我都會幫下佢
佢就會乘機教下我佢既家務方式
(我媽知道一定覺得不可思議,因為懶惰的女兒居然會做家務)

其實無可能找個生活方式習慣完全一樣的人
只好找個願意為對方去妥協去改變的人
so far我同麥仔都未因為生活方式而爭執過
不過學習生活真係一個好花時間既課題,我同麥仔都仲有好多不同習慣要磨合下

待續。
/
我的專頁:https://www.facebook.com/hkgirlfriend/