2013年7月，當文憑試成績公佈果一刻，我知道自己達成屋企人一直以黎既心願，成為全家族第一個大學生。同時為自己可以延續學生生涯感到高興，同時對大學生活充滿憧憬，未來迎接我既係一個又一個問號而唔係一個代表終結既句號。
中學生時代，根本唔會諗到前途問題，由其係我地依班垃圾學生，入大學已經係BOUNS，就算係水泡科都會好開心，因為唔係我揀大學，而係大學揀我。我最常問老師既問題唔係我讀果科有冇前途而係問大學好唔好玩，大學多唔多靚女，大學多唔多HALL 雞，住HALL開唔開心。或者未升大學既我，就只識得問依D問題，因為入大學最重要既就係玩!玩!同埋玩!前途?關我鬼事咩!
中學老師對住我地，唔會同我地講前途問題，教BAND2學生既方法，就係同佢地講面前有2條路，一條就係讀書，另一條就係做野，而老師當然係叫你點都要比心機讀書先，考好個試到時再算，因為此時此刻全校都有一個共同目標，就係入大學!入到大學就係皇者!學生既前途就係入大學!當然入左大學之後先知道大把冇入大學既同學比我地活得更好，但當時既我，一心只係諗住入大學，又點會諗到依個問題。如果依樣野係咁易發現，就唔會年年都有成千人要重考第二次，第三次，為既只係一個大學生既銜頭。
大學第一年，所有既野對於我黎講都好新鮮，因為我唔係BAND1中學，根本冇朋友可以借鑒入大學初時既生活，所有既野都要由我一個人去發掘。我仲記得當時搵番中學阿SIR既第一句說話就係問「阿SIR，你當時參加左咩野學會啊?」。依家我已經記唔番當時老師點樣答我，但佢已經成為可以比我詢問大學生活既前輩，縱使我地係唔同大學。間唔中同老師食飯，言談中都係話自己參加左咩野學會，大學生活係點，完完全全冇提過將來出黎到底要做咩野，就算佢地問我，我都答佢地唔到。
就係咁，我既大學生涯就過左三年，其間可以話冇為自己既前途打算過，英文比以前退步，普通話更加差，都唔知出黎做野點算好。呢一排見番中學老師，先知道自己就快唔係學生，而係一個職場新鮮人。
當我約老師食飯果時，我再唔係以前咁樣覺得老師請學生就會好開心，係一件應份既事，老師唔請就係衰人。反而我係想主動拎張單去找數，因為我有番工，而且請老師食飯就係要答謝佢一直以黎係中學時期對我既循循善誘，呢一刻我要負擔起呢個責任。同時我已經著手準備撰寫畢業論文，同指導老師開始溝通，果種威嚴同中學老師完全唔可以相比，因為佢地既學識同埋見識遠比中學老師高，我同佢係永遠既教授同埋學生關係，中間好似隔住左一道高牆。中學果時會放老師飛機，但大學時，永永遠遠都唔敢放指導老師既飛機。
呢一刻，我對住中學老師已經冇左一種中學時期學生同老師應該要有既一種距離，反而我更放膽問佢中學時期唔會問既問題，因為佢就好似我既朋友一樣。
當老師同我講新一年學校唔同佢續約果時，我知道自己已經要面對社會，認真諗下仲諗唔諗住做老師，因為我想做，都要有人請先得。我同自己既中學老師一樣，將來都想做一個好老師，而我第一步就係報pgde。係大學二年級果時，有機會比我轉做教育雙學位，但係果時我咩都唔知，同時唔上心，搞到錯過左呢個機會。依家既我就只有報教育文憑，同老師傾計果時都係傾番教育依一行，聽下佢講做老師既辛酸，講下我間中學既壞話，比著我仲係中學生果時，老師如何唔係學校教既，係絕對唔會提唔續約三個字。
但我聽住老師話學校點解唔同佢續約，講下學校高層做野有幾差果時，我意識到自己真係大個仔了，老師唔再避諱講學校既野，我同老師都由師生轉變成為朋友關係。我開始擔心自己會唔會搵唔到工，會唔會一開始連pgde都唔收我，會唔會做唔到一個好老師。我頂唔頂得住學校入面既黑暗野呢?4年之前我仲係一個成日笑老師，唔太尊重老師既學生，但4年之後，我好可能會成為一個唔被學生尊重既老師，我好擔心，昔日我同我朋友對待老師既情況突然浮現番係我腦海入面。
到底我未來會點呢，會唔會好似老師口中所講，做到三十幾都搵唔到長約呢?要一年一年咁續約，唔敢結婚同埋買樓，因為一冇約續，人生就會玩完，所有野都負擔唔起。我會唔會好似學校班老屎忽咁做教畜呢?
因為一次續約不成，令我反思其實做老師係有好多野要去考慮，而呢d問題正在一步步咁迫近我。
係呢一刻!傾既唔再係點樣入大學，而係點樣入職場。
其實人與人之間既關係隨著時間而不停改變，4年前既學生同4年後既學生，心態上已經大為不同，今日係老師面前，我真的成長了。
