如果，可能，或者，萬一，佢唔鍾意我呢？

首先，我要對讀男校既你致以深切哀悼。

然後，雖然你篇野係唔關男校生事，但都請大家繼續睇落去。

中學時代，我諗唔少人都經歷過一次或以上既眼神攻防戰。

明明隔住幾行，又隔住一個二個人頭，但都會無啦啦上上下堂，同佢有個不經意既眼神接觸。

果個佢，莫過於就係曖昧對象。

一秒兩秒三秒，每次既攻防戰，大多都係三秒內結束，但就足以提供無限既幻想空間比你，夠你自HIGH成日。

唔知幾時開始，你每一日返學既最大期待，就係個幾秒。

有時一整日都無眼神接觸，成個人就會失落到極點，又會胡思亂想一啲九唔搭八既野。

應該話，無論有無接觸上佢既靈魂之窗，你都會亂咁諗野，只係正面同負面既分別。

事實上，你好享受呢種感覺，你好享受內心個種騷動。甚至希望，呢種日子永遠唔好完結。

但同時，你好好奇，你想知道，個種曖昧，可唔可以變成戀愛。不過，你又怕呢一切就好似泡沫咁，一篤就穿，再無辦法返去以前。

你無十足既把握，雖然晚晚同佢msn/whatsapp，但係一返到學校就好似個唔熟既同學咁。

個種若即若離既感覺令你無信心去冒險。你寧願一直係個泡沫入面，但求絕對安全，但求唔好失去。

有幾多對曖昧既男女，因為咁樣，而無疾而終。

如果，可能，萬一，或者，等等既假設充斥你既腦袋，你怕返唔到轉頭。

的確，表白，真係返唔到轉頭。但唔表白，你同佢，又有幾大機會可以自自然然起一齊，定係自自然然變成最好既異性朋友。

我覺得，真正愛一個人，會想擁有，想佔有。

你希望你唔再係佢既其中之一，而係佢既唯一。

你希望唔需要再去猜測佢同時同幾多人whatsapp緊，你希望得到佢既肯定。

有啲野，你唔問，就永遠無可能知。

雖然可悲既事係，隨住資訊發達時代發展社會風氣影響，時下女仔有一隊軍隊實屬等閒，表白變作加速死亡除役既機會大大提高，同以前中學時期既純樸截然不同……

不過，早日收拾心情都未嘗係一件壞事。

係度鼓勵大家，努力去追求自己所愛。係衡量過各方面既輕重之後，勇敢向前衝吧！不論你係男定女，唔試過，又點知結果呢？

免責聲明：表白可能令你失去一個原本好好既朋友，可能令你係佢既朋友圈入面消失，可能令你失去人生目標等等……請在作出多方面評估後方進行。

最後最後，希望無人睇完呢篇野之後衝動到去同人表白，祝你好運。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

多一個like，多一點鼓勵，感激不盡！

如果，可能，或者，萬一，佢唔鍾意我呢？
你有無諗過自殺？……唔係唔係，係表白至岩。