如果我有一千萬,我會留係香港,因為香港係有錢佬既天堂,只要有錢就有娛樂同享受。如果我得番一千蚊,我都會留係香港,因為我根本冇錢移民,只要冇錢就冇生活同興趣。香港比人既感覺係充滿著冷酷無情同埋壓迫既社會,每個人生活係香港都面對唔同既問題。中學生怕入唔到大學、大學生怕自己讀果科冇前途、畢業生怕自己搵唔到工做、打工仔怕被老細炒又怕無職升、情況又怕無錢買樓結婚、為人父母又怕香港教育制度太差、老左又怕退休金唔夠使,病左唔敢睇醫生。如果要用2個字去形容香港人既一生,我會用「好慘」,三個字形容係「好撚慘」。

呢個時候就會有人同你講台灣有幾好,外國有幾好,點好點好,總之點都好過香港呢個鬼地方。佢地會同你講,有錢一定一定要移民,一定要離開香港。但作為一個讀歷史既學生,我係絕對睇唔起依班人。可能係班中產高學歷人士心目中,辜勿論我做咩都好,我已經低過依班專業人士一等,更何況我唔係讀三大?班離地中產有錢有學識又點,但係佢冇心,一個與香港同生共死既心。唔好以為自己做醫生、律師、工程師就係香港既大偉人,因為佢地只係一心搵錢,搵夠錢就會移民既人。每當問佢地點解要移民,佢就會數十幾個理由比你聽,例如中國共產黨收番香港之後香港玩完架啦或者香港太過辛苦,物價太高,總之佢地一定會有理由。

但當你問佢地點解唔出力解決問題時,佢地既答案會係堅決而統一,就係冇能力。心水清既讀者應該知道香港人最中意既台灣初時係比依家既香港更加專制既地方。或者有部份台灣人會想方法去離開,但大部份台灣人都係留在家園,為自由而戰。

筆者在此先解釋美麗島事件。美麗島事件係以美麗島雜誌社成員為核心既黨外運動人士,於1979年12月10日組織群眾進行遊行及演講,訴求民主與自由,終結黨禁和戒嚴。期間配戴青天白日徽章既不明人士混入群眾向朝演講者投擲雞蛋挑釁。而外圍的部隊將群眾完全包圍,釋放催淚彈,並逐步縮小包圍圈,引爆警民衝突。事件發生後,大量重要黨外人士遭到逮捕同審判,甚至一度以叛亂罪問死。最後係國際人權組織的關切、各國媒體來台採訪,以及各界壓力下,除施明德判無期徒刑外,其餘皆以有期徒刑論處。

係一個資訊比依家更加唔發達,媒體更加冇編輯自主既年代,對住國民黨政府既暴政,台灣人冇怕,反而係更加勇敢去追求民主自由。到最後成功迫使政府解放黨禁同埋報禁。台灣人做到既,點解香港人做唔到?

太陽花學運或者每位讀者都聽過,有d更加係對成件事既發展更加係耳熟能詳,但今日我想介紹既係1990年3月16日至3月22日發生既學生運動。呢段前期間將近6000名大學生集結係中正紀念堂廣場上靜坐,佢地提出「解散國民大會」、「廢除臨時條款」、「召開國是會議」、以及「政經改革時間表」等四大訴求。呢次係中華民國政府遷台以黎規模最大既學生抗議運動,李登輝總統及後一方面依照其對學生的承諾,召開國是會議,另一方面係1991年廢除《動員戡亂時期臨時條款》,並結束「萬年國會」的運作,台灣的民主化進入新階段。

台灣人再一次為台灣民主化進程而努力,但香港人呢?有錢既都只係諗住點樣去移民,上至中產下至學生,人人開口埋口就話台灣有權可以一人一票選總統有幾好,但另一方面有冇諗過依d權利係經過幾多人既努力,幾多烈士既鮮血去爭取番黎?唔該你班港豬唔好一味諗住移民去台灣就唔使理香港既生死。

引用蔡英文總統就任時發行既郵票,入面有一句說話提到「國家偉大嗎?國家因你而偉大。」依一句說話我都好想同每一位港豬講。香港偉大嗎?香港因你而偉大。因為每一個香港人既付出,先有今時今日既香港,香港既未來掌握係每一個香港人手上,希望各位讀者唔好再一味想移民,而係用心去改變香港。

香港人最叻就係騎劫人地既成果,寧願離開家園都唔會留係到捍衛自己心愛既地方,因為香港人最愛既係自己,唔係土生土長既家園。或者今日既我做唔到任何既野,但我相信只要堅持去喚醒每一個香港人,十年之後,或者會比咩都唔做既我更加有用。就算只有一個人睇我既文章,一個人認同我既見解,我都會用心去寫,因為我相信文字最能撼動人心,我相信香港人有能力去建設民主香港,我更加相信香港人應該要堅持家園同埋價值,無論要用幾多時間同埋代價都好。我既信念只係三個字,就係我相信。今日大家或者唔明梁天琦做緊咩,但十年之後,我相信人人都會明白佢既苦心。

時代變,人物風景都改變,我們英勇卻未輸從前如常在苦困裡彰顯未會變。