是咁的,上次篇《韓國野根本係垃圾食物》 一出街,網上有好多同路中人即刻「被呃Like」,亦(果然)有好多網友即刻屌爆我。逐篇回應實在太煩,加上一個咁好嘅題材比我呃多篇槁,不寫白不寫,所以就將網友嘅回應輯錄出嚟一篇過回應。簡而言之就係一句:

其實用垃圾價食垃圾我OK架

以下用『』括住嘅係唔同網站嘅網友嘅留言,我發現D回應都大同小異,自己對號入坐啦:


–『呃Like!標題黨』
一半半啦,好多網友都有講過,我最主要就係屌果D見到韓國兩個字就狗衝去食嘅On 9 仔。我知呀,我都有講韓國唔係冇好野食,我都知係韓國嘅話食嘅野會有唔同。咁係香港嘅韓國野真係好撚垃圾喎(哦!仲話唔係標題黨)老老豆豆,如果我將篇文改個名做《其實我覺得係香港D韓國野唔係好抵食囉》,寫完道氣都洩左一半啦,你都唔會入嚟啦係咪先,反正我內文有講清楚想講咩,D係都唔睇內文我都吹佢唔脹。


–『你朝早食茶記早餐咪又係醃製肉加即食麵/碟頭飯咪一樣;麥當勞都係垃圾食物啦』
個價差幾遠呀大佬,你睇下碟頭飯賣到200蚊有冇人食


–『西多士米一樣比窮人食,個個米走去食,仲有野食都可以同打飛機,可見樓主都系毒L一名妒忌心強』
明明我係話韓國仔用泡菜打飛機 />\ 到底佢係覺得韓國仔都係毒L定係有毒寫障礙 />\


–『韓國既部隊鍋你食過未?賣點係又平又多唔係賣好食羅宋湯夠係垃圾堆埋一齊啦 公平小小啦』
E個好笑,先唔講將主菜居然要同餐湯比,First of all technically I didn’t pay for the soup!(西湯個人係要西D)送架喎大佬。即係咁,如果有邊間韓果野買例湯送部隊鍋嘅我唔會投訴,幫佢做埋代言人都仲得。
同埋我而家就係屌緊佢又貴又唔好食,你要多嘅食頹飯仲多啦。


–『咁打邊爐都係啦.自己平平地就煮到你又出去吃?btw韓國geh湯底你以為真係放包辛拉麵調料落去啊?7少陣得唔得啊』
首先我唔知佢食開邊間打邊爐,我食開嘅打邊爐都可以食「一塊」肥牛、「一條」大蝦、「一粒」雞子,我叫到成枱野碟碟唔同都係百幾二百一個人分分鐘仲平過D濕鳩部隊鍋,你自己打邊爐咪又係肥牛肥牛同肥牛
第二,如果有間韓國野話自己個部隊鍋係用牛骨加秘制香料煲十個鐘,再配上十幾種名貴食材,真嘅話佢賣到$300蚊我都會食。但而家唔係喎,一間二間D人狗衝去嘅韓國野最後都係食辛辣麵咁撚樣又洗左我幾舊水喎。


–『飲食文化問題姐,外國人都覺得我地食內臟好嘔心』
嗱我係冇屌過佢地嘅味道架(係屌佢地用料Cheap,味道變化少姐),如果你係外國見到班鬼妹拜長龍食舊貴到嘔嘅酸縮叉燒,仲要大叫「Oh! Chinese Food!」你都笑佢ON 9啦


–『中國菜咁難食居然話好食,廣東菜居然可以歸類為中國菜。廣東菜=/=中國菜,唔唔好將高質廣東菜同蝗蟲菜相提並論…中國菜同漢語一樣,係強行統一下嘅產物,將廣東菜定義為中國菜等於將粵語歸類為漢語方言一樣無恥…將一大堆其實唔似既菜式夾埋一齊講 再聲稱呢種菜式冇得輸其實同打飛機冇分別』
哇屌你有伏!一個唔小心用左國界去分菜式又中左左膠大法?北海道同沖繩食嘅野夠唔同難道又唔係日本野?你要細分唔通又要話部隊鍋係唔知邊個省,炸醬麵又係邊個省,唔可以一個大韓民國咁比咩。明架啦


太多太多Cap唔晒,講到尾你話我係咪根本唔識韓國食物,以偏蓋全?係!擺明啦,你睇下我自介寫D咩先啦。我又唔係學術討論,我只係(代好多人)講你鐘意食垃圾都唔好迫我食。用Cheap料唔係問題呀,整得好食就賣得貴有咩所謂?問題你係香港食過D咩韓國野?果D質素就算一碟四五十蚊都比多佢啦。我成篇野就係屌D人用鑽石價食垃圾嘛,你唔會睇唔明掛。
(如果有邊間韓國野又正宗又抵又好食我唔介意你請我過去)


賤咀格言
『‪賤咀唔賤格。‎純屬主觀。‎絕對偏頗‬ 』‬‬‬
‪‎賤咀男‬ ‪#賤咀‬‬‬廢up

快D Like埋我FB 同 IG 睇埋【賤咀一句】
https://www.facebook.com/badmouthguy/
https://www.instagram.com/bad_mouth_guy/