話說我同麥仔一齊差不多兩年
但我家人都係呢半年先知道麥仔既存在
一齊食過幾次飯，但上我屋企食飯都係上過兩次
尋晚就係第二次。

當日第一次上我家食飯
我媽前幾日已經係咁問麥仔鍾意食咩呀煮咩好呀
平時我啲親戚上來食飯我媽係唔會咁緊張
都係煮番平時既野，最多煮多少少煲番個湯
但麥仔第一次上來，我媽煮左龍蝦！
您知唔知我廿五年，好似無喺我屋企食過龍蝦..

到尋晚第二次上我家食飯
我媽事先無再問我煮咩好呀乜乜乜
反而講左句「休魚期無魚賣喎！」

聽到我好安心，我就叫佢求其煮得咖啦
佢話：「哦咁我求其煮啦煮多mug米啦」
終於！無咁如臨大敵，煮番家常便飯啦

然後尋晚同麥仔一齊放工番去....
我見到我媽拎完一碟又拎一碟上檯
五個人煮左六個餸再加老火湯呀！
平時我地四個人可能都係三四個餸加滾個湯
多左一個人差唔多double餸！

等我話您知尋日有咩
蒸大眼雞（一大條）、泥鯭（幾條）、蒸蟹（幾隻）、蒸肉餅、檸檬雞翼（十幾隻）、菜心、冬瓜湯
海鮮大特價咩？又話休魚期既...
介紹番：肉餅同雞翼係我媽得意之作
可能因為咁所以一次過曬冷整煮哂佢！

媽呀，這是家常便飯嗎？！

好誇張，我媽莫名地喜歡麥仔

隔幾日就問幾時叫麥仔上來食飯呀
下次叫埋佢一齊去邊邊邊啦....等等等
我媽對麥仔仲熱情過我本人對麥仔呀
真係爭在無話麥仔您幾時娶我個女唔洗禮金啦我貼埋大床啦......

Btw 我媽喜歡麥仔與麥仔背景無關
唔係因為佢屋企有無錢有無樓搵緊幾錢
我媽係果種會同我講「有無錢唔緊要呀對您好就得」既媽媽
我好欣慰我有個開明又喜歡我男朋友既媽媽...
但係媽呀，唔好流太多口水嚇親人
一陣人地以為您個女攝灶罅 終於搵到個老襯先咁開心呀
收番埋隻雞脾先啦！低調啲低調啲
/
我的專頁：https://www.facebook.com/hkgirlfriend/
IG: hkgirlfriend