記得以前小學，中學時代每次有默書，小測，甚至考試都會有同學仔出貓，而且都係三五成群組團。

佢地出貓手法都層出不窮，有幾誇張得幾誇張，有幾出奇就有幾出奇，有時候見到佢地出貓手法都忍唔住想笑。

最普遍係將試卷移近隔離位置，坐係前面比較聰明嘅同學不時悄悄舉起試卷比後面同學睇，有啲同學會將寫左字嘅紙條收埋係枱底，有啲人會用鉛筆將唔識串或寫嘅字寫係枱面，有人會寫係包係擦膠外面嘅紙皮到，寫係紙巾上面。甚至有人會偷偷寫落紙仔放落褲袋，然後考試期間中途去廁所偷睇。

而最特別嘅係有啲同學會用好奇怪嘅方式出貓，例如份試卷係選擇題，當佢有問題唔識，偷偷踼前面同學幾下代表第幾題唔識，而前面同學就會按幾多下筆代表係第幾個答案。當然呢啲只限答題比較少嘅題目。

我記得最誇張係小學時候有一段時間興起隱形墨水筆，係寫完落紙後要用筆頭嘅燈照住先會見到。而且最好笑係真係有同學用隱形墨水筆黎出貓，而且老師係早會到警告我地並禁止我地帶隱形墨水筆返學。

雖然出貓同學有好多，而且差唔多全班都知道，但係奇怪嘅現象係大家都好團結，唔會告發比老師聽。

出貓係我地小學時代，中學時代嘅青春回憶，相信睇緊文章嘅你以前一定有過出貓嘅經歷，快啲Tag返你地昔日嘅戰友，伙伴啦！