今日自己一個去游水有感而發。
　
記得N年前未有老婆未有女朋友，做咩都係自己一個人。行山、睇戲、游水、買嘢，有時會同朋友去，但大部份時間都係毒自一人。
　
有女朋友之後，所有項目都變成雙人活動，就算活動係有朋友一齊去，另一半都會痴住一齊去，有時係我痴佢，有時係佢痴我。可能因為多數時間都係假日先會見面，所以雙方都唔會覺得另一半好煩，仲覺得好sweet添！
　
到而家女朋友變咗做老婆，日見夜見，嗰種日日都要痴住嘅衝動無咗，佢去嘅活動，佢會邀請我，但我未必會去，相對上我亦一樣，大家好似無咗當初嘅激情咁，但其實，有時候兩個人就算幾親密都好，相方鍾意嘅嘢始終唔同。就好似我老婆鍾意跳舞，我夏天會去游水，我哋拍拖時我會同佢一齊上跳舞班，佢都會陪我去游水，即使大家對對方嘅活動唔感興趣都好，都會陪另一半參與。
　
但結咗婚後，大家都好似明白咗啲嘢咁，從此我唔同佢一齊跳舞佢唔會話我，佢唔陪我游水我都唔會鬧佢，咁咪各有各活動囉。大家見到面之後，再分享吓自己做咗啲咩。我覺得，一段互相尊重嘅關係應該就係咁。

*事實係，無得睇老婆著泳裝有感而發