睇過「鋼鍊」既，都會知道牛嬸係邊個，雖然我都係牛嬸既追隨者，但自問真係無FANS咁忠實，

但對於佢兩套作品也十分欣賞，第一當然係「鋼鍊」，其次就係今次想講既「銀之匙」。

熱潮過後先黎講，係我既習慣，因為我會覺得一套好既動畫，應該睇完再睇都有感覺。

所以我自己覺得好既動畫，應該係幾時再睇返，都會有呢一種追看既感覺。

其實故事當中的主角八軒係一D都唔簡單，但係佢就比左自己一個好大既框框，

用單一既價值觀比綁死左自己既人生，幸好佢自己勇敢去離開個一個地方，

雖然用左一個好差既字 ─ 「逃避」。

我自己就好憎呢個「逃避」，咁唔通明知自己支持唔到落去，都重要死頂落去？

唔好話反唔反抗，你呢個空間，你連有咩方法去處理都未知，亂咁反抗又有D咩議意？

點解唔抽身出黎，比自己睇一睇自己既情況先？一D只會話人「逃避」既人，其實自己選擇左另一種既「逃避」方法，

去旅行「避」世、惡人先告狀、拋開件事好似好瀟灑咁話唔理，之後又好似好叻咁話自己好正面，

我覺得無問題，但唔該唔好再話人地做咩事要「逃避」？

我覺得佢地呢D人先係到浪費緊自己既人生。

(唔好意思，講遠左，翻返黎先)

故事一直以八軒為中心，佢係農業高中面對既新事都有好細緻既心理描寫，

令人好容易就投入到八軒既角色，而且因為農業高中的生活是八軒及大多數觀眾都未有體驗，

變左觀眾就會同八軒一樣，見到再誇張、熱血、無厘頭既新奇事，就算只係好少內容，都會好準確咁令人會心微笑。

(例如多摩子呢一個人咁傳奇既人物)

但一到左一D面對人性既問題時，又會用返好重同好真實既時間黎表達，

令人好似同八軒一切親身感受過一個經歷，

(例如解剖鹿一事，同成個第一季的豬肉蓋飯，我差點喊左出黎)

但正如之前所說，因為前後都係既事件加上歌曲都將套野包得好輕鬆，好快就令人輕鬆返個心情。

未睇過既人，可能從其他既評論中知道，呢一套主要係講校園、青春、特別多既係家蓄同寵物既關係，

但我自己就真係好建議，唔好睇太多「精讀」，我唔係好想大家好似為左考試，好似「標題黨」咁講返比人知你睇左D咩，

最重要係比個機會自己靜靜地睇完第一集，你想唔想睇第二集？

其次就係，你自己睇完有咩感覺，點解會鍾意或者唔鍾意。

請放棄你地讀書時個D搵重點、背NOTE既心態，

動畫係應該享受，唔係為左同人有水吹而睇... ...

By 九細佬

同文加放一段「銀之匙」第一季的片尾曲，感覺上將沉重的課題過後，帶回輕鬆的一點的釋懷。
https://youtu.be/w37CuoJaXNc