自從中學畢業之後，同朋友見面嘅時間少之有少...
有人要進修，有人要重讀，有人要返工，有人向嘅夢想進發...
由於我成績比較差，所以我係進修嗰班人，喺入面都算識到唔同嘅朋友，但根本維持唔到關係，正確啲嚟講佢地唔係朋友，而係戰友。
除咗功課上嘅問題，Project上嘅問題之外，根本就唔會喺私人時間搵大家，或者短短唔夠一年嘅時間，大家都只係當大家係戰友。
畢業一年之後，中學死黨嘅ＷhatsApp群響得一次比一次少，唔知係唔係大家都有各自圈子關係，感覺上同死黨嘅關係疏遠咗。
我試過喺群度約佢地出嚟食下宵夜，想同佢地傾下計。
「不如今日落街食宵夜？」
「要陪女呀...」朋友A。
「聽日要返工。」朋友B。
「都冇人落，約齊人先喇。」朋友C。
甚至有人已讀不回。
我明...我知要陪女，我都知要返工...但你地可唔可以抽一日時間出嚟見下面，就一日咁多。
唔通真係咁忙咩？一日都唔得？
明明我地喺中學嗰陣成日一齊打機，一齊落街食宵夜，點解畢完業之後好似冇咗朋友呢一回事。
返工真係重要得過朋友？你呢份仲要係Part time，長職返工冇時間我明白...我亦都明白搵錢好重要，但係返緊Part time嗰啲，你地嘅奴性真係咁重咩...
朋友同愛情一樣，都要雙方一齊維繫。
如果咁好彩遇到一位肯主動約朋友落樓下吹水嘅人，我相信佢好努力咁維繫一段友誼。
拒絕之前，應唔應該諗下『自己真係咁多野做』？
嗰位搞手只會一次比一次冷淡，分分鐘到最後冇人係個群度出聲。
朋友，係要見㗎。
