初初細個嗰時，成日都會嫌巴士太慢，不如搭地鐵仲好啦，可以慳多啲時間，盡可能賺每一分每一秒，因為返到屋企可以同朋友打機。
成人之後，Online Game/MSN 嘅時代已經沒落，同朋友打機嘅活動少之有少，間唔中都會玩下PS4嘅......
有次放工而且聽日放假，反正仲有咁多時間剩，廢事同人逼地鐵，就行遠少少等巴士。
巴士嚟到之後，我行去上層搵位坐，見仲有咁多位，就緊係坐靠窗位啦。
喺褲袋度拎部手機出嚟，然後插上耳筒，望住落幕嘅街景，人與人之間路過，香港人嘅生活節奏，都可以望得一清二楚。
途中又會思考下人生，隨著歌曲風格嘅轉變，諗嘅野都有所變化，例如節奏快就會諗起中學時期嘅熱血，節奏溫和就會回憶下往事。
間唔中安安靜靜坐喺位度休息下沉思下，都唔係一件過份嘅事。
有冇發覺細個嗰陣成日都會坐車頭位，而大個就會調返轉，可能人大咗漸漸失去探索精神掛，至少我唔會主動坐車頭位。
好彩嘅時候，隨時會有靚仔靚女坐你左右。
巴士雖然慢，但佢可以俾到你休息嘅環境，唔會好似地鐵咁要轉車；地鐵的確係比巴士快，但好大機會要同其他人逼，特別喺繁忙時段。
其實，講咁多嘢都冇用，最緊要都係安全返到屋企啫。
