是咁的,我有個好朋友,佢叫啊明,黑黑實實,大大隻隻,靚靚仔仔咁。
佢就踢波嘅,校隊首席前鋒,三年以來計計埋埋都應該好似入左一球架!直頭拍得住今時今日的朗尼呀!
哎,原來講少左兩個字,校隊首席後備前鋒先啱。
不過咁,佢份人都幾和善,所以人緣都唔錯。
入翻正題先,咁就話說有一次嘅學屆比賽,教練史無前例咁擺左佢打正選,擺左個4 2 3 1陣式。
「啊明,踢好啲呀,唔好令教練失望。」
其實作為啊明嘅朋友,我都幾開心,啊明終於都有機會表現自己啦。
一如以往,我係場邊灌左枝葡萄適,隨手將個空樽拋埋一二邊,就行入場比賽。
一開波無耐,我就係中場搶到控球權,我望一望啊明嘅位置。
「上呀,比卡明,就決定係你啦!」我大叫一聲,一個高波斬俾啊明。
「比卡比卡!」啊明一腳將個波控係身前,一個拖舟轉身,一推,嘩,單刀!
啊明右腳推橫一步,拉弓,射呀!
入左!入左!入左!入左!入左!入左!入左!入左!入左!入左!入左!入左!入左!入左!入左!
真係入左!
啊明入左呀!
我無睇錯,係啊明成個人入左龍門呀!
啊明佢拉弓一射個一下,成個人唔知點解跣低左,成個人不受控制咁滑向龍門,對方守門員都嚇到呆左。
啊明佢卡住左係龍門個網裏面,出唔翻嚟。結果,教練打電話叫左消防。
成兩個鐘之後,啊明終於係一眾攝影機之下,比消防救左出嚟。
第二日朝早,報紙大字標題「港足球學屆,現罕見意外,網民:好似地標」「足球小將被困龍門網」「足球比賽奇景,球員卡在龍門任人影」
由出事到啊明出院,我一直都陪住佢。
唔係因為我地係好朋友,而係因為............................
...................
....................
「唔好俾我知,邊條仆街將樽空嘅葡萄適扔係地下,我一定會搵佢算賬!」
「你老母仲要係EX,咁難飲!」
啊明,真係好對唔住。你放心,我唔會俾你知架。
完。