人越大,對過去嘅記憶開始變得越來越模糊,唔係想留就留得住。
有趣嘅係,每當我聽返 周杰倫 嘅舊歌,腦海裡面都會閃過一啲舊陣時嘅片段。
周杰倫嘅歌就係有咁嘅魔力,每一首歌都好似係代表著一段往事。
 
《星晴》令我諗返起嗰晚行沙灘,我同你肩並肩手貼手,
每次指尖觸碰嘅一瞬間都會有種心跳加速嘅感覺,當時我地嘅世界真係好單純。
 
「手牽手 一步兩步三步四步 望著天」─《星晴》
 
「愛能不能夠永遠單純沒有悲哀」─《簡單愛》

 
每次下雨天聽返《晴天》,都總會記返起放學同你撐同一把遮擋雨嘅日子,
當年嘅黃雨又點會好似而家咁誇張?《開不了口》彷彿將我帶返去同你告白嗰一幕。
《妳聽得到》當時每晚都會打電話同你促膝長談,
而家諗返,彷彿仲可以聽到你嗰邊背景聲傳嚟周杰倫嘅歌,仲有你隻貓嘅喵嗚聲。
 
「妳對我有多重要 我後悔沒 讓妳知道」─《開不了口》
 
「堅持學單純的小孩 我捨不得離開」─《妳聽得到》
 
然而快樂嘅日子總係唔長久。《安靜》令我記返起最後嗰段日子,
若果嗰次嗌交我地唔係堅持自己無錯,唔係以沉默為終結。
又或者上天俾個機會我返到過去向你道歉,可能結局就會變得唔一樣?
 
「我會學著放棄你 是因為我太愛你」─《安靜》
 
「想回到過去 試著讓故事繼續 至少不再讓妳離我而去」─《回到過去》
 
好慶幸自己經歷過周杰倫嘅全盛時期,嗰陣佢嘅歌可以話係每個人嘅共同語言。
不論男女,就算經歷唔一樣,背後都總係存在著佢嘅歌。
 
時光匆匆數十載,而家再聽返,會發現已經唔再係一首歌咁簡單。

熟悉嘅旋律同歌詞裡面,原來盛載著一段段珍貴嘅回憶。