我成日同我啲台灣朋友講，要入籍做香港人，第一個測試係能否流利背出及適時引用周星馳電影對白。而第二個，就係睇吓你可以將「黃子華理論」應用到有幾得心應手。
好早之前我開始認識棟篤笑呢一行，好奇怪地，都唔係由黃子華開始嘅。直至有朋友推介我睇佢《秋前算帳》講關於六四嗰段，我先真正開始欣賞黃子華。

你有睇過嗰段片嘅話（喂其實你無睇過嘅都唔好意思繼續睇呢篇文啦下嘛？仲唔馬上返出去youtube搵？！），會知道佢個尺度係可以嚇死人。作為一個藝人，唔理係咪真係有秋後算帳都好啦，佢都淨係專注喺佢想表達嘅信息，共產黨都照串，吹咩。你估真係咁易呀，唔係個個藝人都會喺呢個風氣底下咁敢言架，睇吓幾多人幾討厭政治？但觀乎子華喺雨傘革命爆發之後嗰場紅館show《唔黐線唔正常》，佢係連佔中都夠膽公開撐。究竟係要對呢片土地有幾珍惜，先至講得出呢啲嘢，唔怕觀眾流失？

我，就係屎忽撞棍，咁好彩睇正佢講佔中講到眼濕濕嗰場。子華話：「可能到最後我哋咩都得唔到，但係……我哋已經……已經向全世界……證明咗……我哋香港人……係光‧明‧磊‧落！」作為一個啱啱喺佔領區過嚟放小息嘅暴民，見到自己偶像咁撐香港人，加上當時雨傘革命停滯不前所帶嚟嘅沮喪同憤慨，心入面真係何其咁滾動。

我鍾意睇黃子華嘅程度，係直情當佢好似書咁讀，經常溫故知新。撞啱一個人毒自喺屋企食飯，我會求其search一集黃子華棟篤笑嚟翻睇。係呀，明明睇過好多次架喇，咁大台重播周星馳你又坐定定睇？

黃子華嘅棟篤笑，不嬲都唔係淨係為咗想入場觀眾笑到肚痛咁簡單。佢嘅show，好多內容都係與時事政治同民生有關。由六四、回歸、金融風暴到樓價高企，香港嘅問題，佢比好多人都預視得早。講論述嘅入屋程度，無咩邊個政客夠子華嚟。

而家見到女朋友發脾氣，我會明白女人投訴「從來你都乜乜乜」，只係講緊第三次發生嘅事；想呻窮，我會話早知由幼稚園開始就唔讀，將啲學費攞晒去投資利疊利，今時今日就發咗達啦；講到香港人鍾意睇人仆街，我會話唔係要你比返兩粒魚蛋我呀，係要攞走佢多咗嗰兩粒呀大家一齊食得好仆街咁囉咩啫……根本就多到數都數唔完。

子華佔據咗我人生好大嘅版圖，係非常重要嘅一位偶像。我在此宣佈，直到永遠加一年咁耐，佢都會係我嘅第一位男神！

（老老豆豆，寫完篇文之後我又突然唔係好想出。無人睇就費事啦；有人睇，咪即係多幾條目契同我爭佢新出舞台劇嘅飛？！今次仲有法拉……買唔到我真係會喊架嗚嗚…………炒子華飛嘅一世生痔瘡！係咁。）

【後記：出完篇文先見到有訪問子華，佢話本身有諗過照搞棟篤笑，但香港嘅情況已經令佢笑唔出。聽到真係好心噏……】

網絡作家b612 – facebook專頁： http://www.facebook.com/b612lpp

（鍾意睇嘅去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」