人愈大，社交圈子就愈複雜，你唔能夠將所有嘢都同人講。
同公司同事關係最淺，只可以講公事。
同朋友就深啲，會講心事，但講公事又怕佢無興趣聽。
　
雖然喺朋友圈當中，我廢話多過堆填區啲垃圾，但其實我唔太鍾意咩事都同人分享。因為唔想將啲負能量影響到身邊人。女朋友都係一樣，平時好少講嘢，但係…
　
對住我，女朋友就變咗做一個吹水王，成日都呃水吹。
　
「做乜面燶燶啊～」女友。
「今日返工食咗隻死貓…」
「件事係點？」

　
起初，我只係簡略咁吐一吐苦水就算，但女朋友總係誓不罷休，死都要聽晒完整對話先安落。「之後佢點講？」「你點答佢？」「佢下一句講咩？」
　
「哦～原來係咁…不過一陣出街食乜？」
「嘩轉話題轉得咁快嘅…」
「反正你搵煙灰缸敲你老闆個頭，我都支持你嫁啦～」
「咁…去食米線囉。」
「又食米線？！噫～」
「咁妳話事喇。話說Hunter漫畫又連載返。」
「係咩？係咪之前停咗好耐，而家講緊咩？」
「妳都無睇，知黎做乜啫…」
「咩啊～我知道小岡變大岡嫁！」
「好耐啦已經！」
「咁而家講到邊啫～」
　
女朋友轉話題可以好快，吹水話題亦千變萬化。我都未講完本漫畫，佢又突然轉話題講《太陽的後裔》大結局。
如果每個圈子都有分深淺，同事淺、朋友深。
咁女朋友就係全包，由淺入到Deep Deep佢都包辦晒。
　
全靠呢個吹水王，先可以令我開口講咁多嘢。
亦只有女朋友，先咁眼利睇得出我有面燶燶。
　
－－－－－－－－－－－
ig：BlueGodZi