一段中學生跑全校唱洗腦歌的影片被瘋傳。就教學立場，我就覺得非常有效，個男高音仲好入動聽添。隻歌喺我個腦海loop咗成晚，每次有人share，我都忍唔住撳入去睇多次。相信唔止間中學，每個學生睇完都會記得首歌內容。
　
不過，有人就話影片中學生就拍得好差，好樣衰，一定畀人恥笑足成世…
　
的確不難想像，十年後當三位主角約埋其他同學仔出黎飯聚，講返起呢條片，亦肯定會惹到哄場大笑。
但我又唔覺係咩羞恥嘅事…
　
青春，就係出盡住力去做好一件事。結果好與壞，根本唔重要。

　
加上，中學飯聚梗係互講以前嘅柒事嫁啦，唔通「以前我哋全班都好努力讀書啊～哈哈哈哈～」咁啊？
大家有個共同話題，唔洗咁尷尬之餘，又可以避開互相鬥職位高，鬥邊個嫁到好老公嘅話題。
　
你估嗰幾個學生會認為，條片會拍到佢哋成個宋仲基咁，全校女生Oppa Oppa咁叫咩？
至少，幾個學生明知會畀人笑，都肯企出黎拍條片。
而家回望返中學時期，其實做好多嘢都柒柒哋。
人愈大，就愈怕失敗，承受唔到畀人笑。
試問一間公司有幾多人，做到隻狗咁，明知人工低福利差，但連轉工都唔敢？
　
笑唔係問題，段片被瘋傳，就係因為佢好笑。
可笑但並不可恥，能夠擁有回憶一世嘅青春柒事，係好事。
到你老咗，回想三十歲打後嗰十年工作點樣榨乾你，你唔會笑得出。
但當講起，呢段短短幾分鐘影片，就會覺得…其實都幾開心！
　
Ig：BlueGodZi