話說，我之前去左一間鬼屋，好恐怖嘅鬼屋。不過，我一啲都唔驚。
唔好誤會，其實我係好細膽。
我唔驚嘅原因，係因為我完全唔明佢講咩。
事源我去左日本九州旅行。我地去左一個超大嘅遊樂場，叫豪登斯堡。咁果度有好多鬼屋。我同朋友又超鍾意去鬼屋玩。咁於是我地去晒咁多個鬼屋啦。
果度嘅遊樂設施主要都係以視覺同聽覺為主。所以佢地嘅鬼屋都唔例外。
有一間鬼屋，聽講話好恐怖。咁於是我同朋友都興致勃勃咁去左果間鬼屋啦。
入到去，周圍都漆黑一片。我地淨係可以拉住一條繩黎行。呢part其實幾刺激。跟住，行下行下就到左一間戲院咁嘅地方。咁工作人員就示意我地坐低，然後巴啦巴啦講左一堆野。因為我唔識聽日文，所以我就問我果朋友啦。佢就同我講帶起旁邊嘅耳機。果隻耳機係超隔音果種耳機，同埋超大。咁我帶住耳機啦。然後就見到螢幕上，就開始有畫面。耳機就開始播放一啲恐怖嘅音樂，即係你成日係鬼片聽到果啲。咁都幾恐怖。不過跟住先戲玉。
咁跟住就播放故事。咁當然就係一大堆日文啦。咁，當然啦，我一句都唔明。雖然我聽音樂知道個故事一定好恐怖，不過我。完。全。唔。明。咁我就只可以兩頭望。因為我都唔知做咩野好。個故事又唔明。
忽然…有人拍我肩膀。我心諗，一定係我周圍望，後面果條友叫我唔好再望。
咁我無理啦，於是好無奈咁繼續睇果個故事。
跟住，我諗諗下，唔係wo。周圍咁黑，後面果條友點可能見到我。（套電影播放嘅光，唔強。所以好難睇到四周。有時只係有聲無畫面）而且，座位與座位之間相隔好遠，同埋有高低相距。我無可能會阻住後面果條友。
我愈諗愈驚。不過好快就完左。然後我地就離開左間鬼屋。
我朋友問我，「頭先有無人拍你肩膀呀？」我呆左一呆，原來係劇情一部分。
如果我聽得明，一定仲恐怖。
不過，我之後諗，佢地點樣可以係咁漆黑嘅環境，同時拍晒咁多個人嘅肩膀。
