是咁的,我阿媽一直都係用緊撳撳電話,但最近佢電話撳到壞咗,咪諗住買部小米佢玩吓囉。你知啦,近排咁多斬人案,有咩事都可以丟出去當手榴彈嘛。
 
不過估唔到,惡夢就係咁發生。
 
「仔,記住今晚老豆生日,準時返黎食飯啊!」我老豆係嚴父一名,超大男人,但又好鍚我阿媽。
「知啦Mum~」

當日我趕住出門口,同女朋友Mary第一次約會,絕對唔可以遲到。我準時到達間餐廳,女朋友只係遲咗半粒鐘,真係世間少有嘅好女子。
 
「Sorry,我黎遲咗。」Mary。
「我都係啱啱到啫~」
 
其實我好鬼急屎,但一直唔敢行開,怕我去咗廁所Mary會黎到以為我遲到。
 
「唔好意思,我去一去洗手間補妝先!」我懶幽默咁搞咗個gag,就衝入廁所。
 
入到廁所爆石,兩隻手無乜嘢做,正想拎個手機出黎先發覺原來漏咗個手機喺出面,但唔緊要啦,我手機又無收埋J圖,鈴聲又唔係「東京熱」,Mary照道理都唔會咁缺德拎黎睇卦。
 
點知,我爆完石行返出去,就見到Mary個樣黑過我頭先屙出黎嗰堆,如果用佢塊面黎做象形文字,一定係粗口。
 
「Mary,做乜啊?我屙得太耐?」
「阿橙,我好重視呢段感情㗎!」

「咁啱嘅?我都係啊。」
「我唔係一個隨便出賣身體嘅女人。」
「嘩我直頭唔敢諗添啊…」
「但我覺得你係一個周圍食女嘅人囉。」
 
Mary用眼神指一指我放喺枱個電話,有個whatsapp訊息係我阿媽send黎。原來佢唔識打字,又扮晒嘢想打英文,個訊息就變成…
 
『i m mum mum~Tonight come eat(蟠桃emoji)??』

「橙先生,請問你今晚食咩蟠桃啊?邊個係你mum mum啊?」
「妳誤會咗,唔係食嗰啲mum mum啊,佢係我阿媽啊!Mum啊!今日我老豆生日返去食生日飯啊!」
 
金翅仆街鳥!之前幫阿媽裝咗whatsapp諗住溝通方便啲,但佢唔識打字,又唔肯錄音,佢話錄音同傾電話無分別,OK~咁咪用手寫囉!嫌慢嘅其實用Emoji都可以。
 
但估唔到會搞成咁…
我見Mary仲係半信半疑,我就開個Whatsapp畀佢睇吓,之前幫佢換咗頭像,佢學識咗仲開心到周圍影相添。
 
 
*同一時間,屋企*
 
「Dad Dad啊~今日你生日,我叫咗阿仔準時返黎食飯啦~」
「衰仔!我生日都要出街!」

「吖~你今日好鬼靚仔,成個Oppa咁,我幫你影幅相吖。」
「唔影!最憎影相,我去沖涼先。」
 
「Dad Dad~等我影吓你個Body先~」
「痴線啊?我無著衫啊!咪亂影!」
「哈哈哈!」
 
 
*回到餐廳*
 
當我打開個Whatsapp,見到嘅唔係我阿媽嘅頭像,而係一幅又一幅雪白嘅屎忽…成間餐廳嘅空氣好似凝固咗咁…我鼓起勇氣打破沉默。
 
「Mary,我知道眼前嘅巧合,仲難以置信過葉念琛,但如果我話呢個係我老豆嘅屎忽…妳信唔信?」
「你今晚玩得開心啲。」
 
結果我就自己一個返屋企。
如果用我個樣黎做象形文字,會係「無撚奈」。
同家人慶祝生日真係開心,哈哈。
 
ig:BlueGodZi