大家好，我叫阿閃。
你一定好奇怪，點解我唔會「我係…優獸大都…會…入面…嘅…阿閃…」
因為我打緊字啊蠢才！
不過呢篇文，其實我足足打咗幾個月，套戲未上畫我就開始打。呢個社會節奏太快，我哋班樹懶，成日都要諗前人幾步，預先將事情做好。
「哎啊！隻樹懶動作咁慢好搞笑啊～」就係因為你班發神經，我預知你班人睇完戲一定咁諗，我就預先打定篇文，幫自己大平反。
首先，雖然我叫樹懶，但唔代表我懶…
只係動作慢啫，用IE上網夠慢啦，唔通你又話佢懶？
我哋爬行速度喺樹上面移動速度係每分鐘4米。
地面仲陰公，每分鐘得2米。
可想而知樹懶係唔可能過馬路…
亦食唔到迴轉壽司，我隻手唔夠個迴轉快啊大佬！
所以，樹懶只可以食樹葉（注：無畀風吹郁嘅樹葉）
唔好笑啊！樹懶其實一出世就要面對各種挑戰！
若果我BB仔時唔小心跌落地的話，
我餓死咗，阿媽都未執得返我上黎。
起初，我會覺得樹懶係被淘汰嘅一群，做乜都慢過人。
但咁多年黎，樹懶都無因為太慢而絕種。
我就意識到…唔係我哋慢，係其他生物太快。
我聽過有一種生物。
未出世就爭幼稚園，幾歲就儲錢買樓，然後供一世樓。
呢種弱智生物就係香港人。
無錯，愈快完成一件事，就可以完成更多事。
但香港人每日閒閒哋完成一千幾百樣事情，
都無一件係自己鍾意做嘅事。
我就睇唔出咁快有乜意思。
我鍾意食葉，全日淨係食葉，不知幾爽！
點解香港人要咁快？
因為佢哋有一種特殊基因，叫「死唔執輸」。
佢哋好介意自己得到比其他人少，於是搏命搶。
一個搶得愈多，另一個就要搶得更加多，沒完沒了。
好多香港人都話，「咁慢咪無競爭力囉！」
但有冇諗過，「快」會逼死人，慢唔會…
香港人以為行慢一步就會死，但樹懶都未死，
你有乜資格講慢會死？
慾望係無止境，趕頭趕命得到嘅唔係滿足感，只係想得到更多。
如果全地球都好似樹懶咁慢，呢個世界就美好得多。
每個人都慢慢黎，享受自己做緊嘅每一件事…
不過無奈地你哋實在太蠢，令我要去適應你哋。
記唔記得套戲結尾我超速駕駛？
其實我趕緊去睇首映…
無錯，套戲未上我就要去…
因為行紅地氈要好花時間…
「…」
「噗哈！」
阿力個笑話好好笑，原來駱駝有三個峰因為佢大咗肚！
（利申：啱啱先get到，戲入面係導演叫我笑…我連佢講乜都未聽得切…隻狐狸係咪扮緊黃子華，我好鬼鍾意佢㗎！）
ig：BlueGodZi
