今日被旅行後遺症同假期後遺症夾擊之下返工(利申:遲到),等緊巴士時見到一位阿媽將自己個仔仔送上幼稚園校車,個小朋友喊到痴晒線,校車上面嘅校工一手抱佢上校車。
 
「哈哈,放咗幾日假唔捨得返學呢~」
「係啦,放假陪佢周圍玩,佢就特別痴人。」
「返學都開心啦~同媽咪講拜拜啦~」
 
當然個小朋友唔會開心,眼淚仲不停流,扁晒嘴咁同媽咪揮手拜拜。媽咪一直保持住笑容揮手,直至校車消失於視線。呢位媽咪身穿行政Look全黑套裝,即時恢復返一副返工嘅嚴肅臉,一邊撳手機一邊等巴士。
 
 
校車走咗,一輛老人護理院嘅車停泊路邊。一個婦人推住個坐輪椅嘅伯伯去車尾,圖中個升降台慢慢升高,婦人不捨咁企喺旁邊望實,輪椅上面個伯伯應該係撞聾,好大聲咁同個女人講。
  

「快啲返工啦!遲到啊!唔洗送喇!」
伯伯應該真係聽得唔太清楚,所以婦人講嘢亦好大聲。
「阿爸,下星期一假期,我再黎接你出去同你飲茶!好無?」
 
伯伯不明所意郁一郁隻手,不停點頭,笑晒口咁被送上車。
目送完自己老豆離開,婦人亦急急腳咁等巴士。
 
人生真係一個循環,當你嫌老豆老母煩。
其實你細細個每日賴屎賴尿仲煩…
 
當你覺得老豆老母好長氣,你做乜都要管住你。
但當佢哋老咗,佢連自己都照顧唔到,就要靠你去照顧。
 
而家有好多全日制幼兒園。
小朋友可能見入面嘅哥哥姐姐,仲多過見自己父母。
夜晚放工去接返小朋友返屋企,返到去食埋飯就要訓覺。
 
點解香港人要靠公眾假期,先有機會陪到親人去玩或者飲茶?
最後老老套套咁講,珍惜眼前人,愛人親人朋友都係一樣。
 
ig:BlueGodZi
專頁:http://www.facebook.com/BlueGodZi