「呵欠！」
伸一個懶腰，發覺自己對眼已經聚焦唔到，望望手機既鐘。
「吊你！成三點喇！」諗起聽日仲要去見客，而家仲趕緊手頭上既設計圖，不禁唏噓生活真係好逼人。附出不成正比既時間， 但都未必可以得到你想要既生活，世界真係冇等價交換，如果唔係呢幾年既附出，我應該已經住大屋，有車有樓，點會仲喺間公屋同細佬，老豆老母一齊住？
「做人要上進d，唔可以成日唔嗲唔吊！」
每次想放棄既時候，總係想係你呢一句說話。
望一望電話，有一大堆messages，全部都係freelace partner追Job，足球隊隊友Call 踢波，吹水group既j圖，同埋我女朋友，jess既messages。我呢d重色輕友既人，更係第一時睇咗條女既messages先啦。 （唔好吊我，你地都係咁架啦！）
「點呀？仲做緊野？」
「記得唔好咁夜訓喇！明日仲要早起！」
「我訓喇，知你應該忙緊，但記得唔好做夜，明日我叫你起身啦，傻豬！」
唔好以為我女朋友只係會打字，其實當中大部份都emoij，我只係翻譯咗比大家睇姐。
望一望上線時間，係一點幾。即係我呢個男朋友，喺女友send咗messages卑我既兩個鐘，都冇覆佢，如果佢係港女，我一定死鳩緊。咁佢當然唔係啦。
我立刻回一個message，
「sorry 做到唔知時間，早點休息明日見！」
其實我覺得自己打呢個message有d鳩，因為佢好明顯已經休息緊，試問當你訓緊覺，跟住因為個收message既聲音而整醒咗你，你睇完，發覺原來係叫你早點訓，我相信你一定會講﹕
「吊你老母！我咪訓緊囉！」
過了一會，Whatapps 仍未顯示是藍色，她應該真的訓着。好彩！如果唔係我真係怕我女朋友會問候我娘親，從而影響到將來既婆媳關係。大家可能問，點解我個message咁正經，唔係應該有「傻豬」呢D字既咩。我只可以講，「傻豬」已經唔喺度。
好累呀！
我放下了要趕的圖，坐在電腦前面，不其然，打開了facebook。有一堆消息，其中一個就係我老死，火牛。呢條友同我好多年兄弟，佢好很鍾意 (真係「好很」，唔係粗口，因為佢係好鍾意同很鍾意！) 做消防員，連寫小說既筆名都係用火牛。記得中學時仲話第日一齊去考，但今日我已經找到我鍾意既設計工作，而呢條友就繼續向住佢既目標進發。
佢個小說Blog上載了一個MV，叫做「一秒停延」。係一首網上改篇歌，背景係一套叫「秒速5厘米」既動畫。其實我只係識龍珠同星矢，其他動畫真係唔識，絕對冇火牛呢個毒男咁鍾意睇卡通片。
個Page 顯示既畫面，係一男一女，好似相遇又好似唔係咁。由於真係好累，所以都係想放鬆下，聽下歌，click入去。感覺係……
好好聽
其中一句歌詞係﹕「你有戒指與盛宴，我再痛都要下咽。」
呢句真係好正。好似將一種，我忘記咗既感覺掘咗出黎。
係悲傷既感覺。
一路開youtube聽呢首歌，我再掃下facebook，不久，我看見了「她」。「她」的status寫着，「明日30號各方好友，早D到，飲多杯。」字下面係一張相，係「她」和未婚夫既婚紗相。喺張相中，「她」笑得好開心，好甜，好幸福。看着呢張相，我咀角上掦一笑，但眼睛郤開始變得濕潤。呢個時刻，啱啱又係唱緊呢句歌詞。
「你有戒指與盛宴，我再痛都要下咽。」
記得了！呢種感覺係早排在facebook見到「她」話會結婚時，嗰種悲傷既感覺。而呢一刻，嗰種感覺，正不停放大。
望着個電腦芒，我開始入咗定，呆咗咁望住「她」笑得好開心既樣。
呢個笑容，我曾經都擁有過。
「你可唔可以做我女朋友？」好幾年前，我在一個場合識到「她」。「她」係一個好清純既女仔。「她」的笑容好甜，「她」身形好似一個model，但「她」其實只係一個少女孩。我看到她，就被她吸引着。我走去結識了「她」，慢慢和「她」溝通，傳whatapps，令到「她」好開心，結果，有一日我表白咗，「她」亦都答應咗，開始咗幾年既快樂時光。
我和「她」一齊，和我以前拍拖好唔同。「她」好温柔，好細心，好照顧我。再深入了解，才知道「她」家庭有問題，令她不喜歡屋企，但又喜歡有自己既家。唔係有間屋，係有家既感覺。我決定，要給「她」一個家。
初初拍拖，真係好甜蜜。我見到「她」，我已經甜哂，真係飯都可以唔食，因為再食我驚有糖尿病。我地一齊行街，一齊食飯，一齊睇戲。好快，「她」都會來我家過夜。講真，我真係好高興「她」肯來我家過夜。我只係住一間好細既公屋，成幾個人住，完全冇私人空間，仲要訓喺聽既床，但「她」沒有介意，我知道，我揾對了人。而且，我屋企人好鍾意「她」，仲成日叫我要對「她」好點。我開始諗結婚，我有時會同火牛傾下結婚買樓既野，唔好以為火牛係毒撚一個，鍾意睇動漫玩模型，佢其實一早上咗岸。記得佢結婚我做佢伴朗，我見到佢好開心，過婚禮好感動。我就諗，唔知我同「她」結婚既時候，會唔會都咁感動呢？一諗，我就會好甜咁笑咗出來。
「傻豬，不如我地遲D結婚！」
講真，呢段光真好幸福。
直到一日
「她」要同我分手。我以為「她」有第二個，其實我只係小人一個。「她」點會係見異思遷既人。分手既時候，「她」講咗好多「她」的不滿，「她」對我既失望，同埋「她」對我們未來既幻滅。
點解會咁……我明明好好對「她」，點解會咁。
我唔甘心，我走去問了「她」的一位好友，而答案，係令我驚訝。
原來
「她」曾經認定我是對的人。
「她」知道我既缺點，「她」提示我，希望我改，但我冇一樣做到。
「她」想我有上進心，但我冇。
我係一個好喱啡既人，「她」唔鍾意我唔沖涼就訓覺，「她」講了好多次，但我依舊一貫。
我對工作係好懶散，我可以因為訓晏咗，唔返工。
我經常話會陪佢，但可以因為踢波，飲野，去玩，而放咗佢喺我屋冇理。
我成日說結婚，但又大洗，根本儲唔到錢。
仲有﹐好多好多……
最重要係，我一路唔覺我自己係咁。
可能你會話，個個男人都係咁啦！冇錯，我都係咁諗，但「她」朋友同我講，「她」說，「她」不是要我完全改變，而係我根本冇誠意去變，連變既諗法都冇。呢一下，真係當頭棒渴。冇錯，我根本冇在意過「她」的感受，只係一直認為「她」對我好係理所當然，也以為「她」從不會離開我，所以我冇理會「她」既不安、不滿。
係，我錯了。
我問，我仲有機會嗎？
冇…..
我揾咗火牛出來飲酒，喺屋村樓梯口。我不禁哭了。為女喊，我未試過。但「她」唔同，因為我已經當「她」係老婆，會一生一世既人。可惜，現在得番我一個。
之後，我曾經去再追求「她」，但已經太遲。分手初期，還會一齊食飯，一齊睇戲，我仲陪過「她」過生日。
可惜，「她」對我的失望，已經蓋過「她」對我的愛意，也蓋過幾年來既美好回憶。又或者，呢幾年，開心既只係我，而「她」只係因為愛我，而令「她」去忍受「她」的不安、「她」的難受。但當愛因不滿、失望而一點一滴減少，終於令「她」忍受不住，下定決心分手。我知道「她」用咗好大勇氣去分手，用咗好大既氣力去令自己過新生活。
日子一日一日咁過﹐我們開始少了聯絡，「她」有「她」既生活，我有我既忙碌。慢慢我只係喺facebook知道「她」的近況。「她」開始拍拖，「她」想要結婚。每當我知道「她」的近況，都只能壓着心中既悲傷，暗地裡希望「她」會幸福。
「做人要上進d，唔可以成日唔嗲唔吊！」
呢句話「她」以前成講，當時我不以為然，可惜我既唔嗲唔吊，令「她」離開了我。
但「她」仍然影響我。
我一段時間工作表現仲差過以前，生活仲爛過以前。但我想起「她」呢句說話，我決定要振作。我改咗好多我唔好既習慣，返工專心咗，做好多freelace賺錢，可始儲錢，改變唔沖涼訓覺既習慣。但一切，都已經太遲。
「你有戒指與盛宴，我再痛都要下咽。」
呢句歌詞，把回憶中既我拉回現實。我定一定神，望一望個芒，仲係「她」的結婚相，仍然係「她」那幸福既笑容。而個Keyboard就有些水在，不只keyboard，我塊面都有。
我望到電腦右下角的日子，顯示着﹕
31.12.2015
「她」已經係一個幸福男人既妻子。
我拿起枱面上既萬寶路，點了一支煙，入了facebook既inbox，找了「她」的名，給她寫了﹕
「傻豬，在除夕既今日，祝你新婚愉快，永遠幸福快樂！」
************************************************************************************
今晚真係好充實，我睇完秒速5厘米，跟住揾到Mark Tai 既「一秒停延」，一路聽既時候，打咗陣「好想告訴你」小說，不其然上咗facebook，見到EX阿嫂話要結婚。
其實呢位EX阿嫂，我只係見過幾次，因為我同我老死飲既時候都係MAN TALK，我地都唔帶另一半。但阿嫂給我感覺，真係好純，好賢淑，我一直相信，我老死呢D咁既情聖，終於揾到個啱既，結束佢換女度日的時光。
點知，有一日，我老死話佢地分咗手。呢個情聖老死，竟然流下男兒淚，我真係當場呆咗。所以我知，「她」對佢真係好重要。我以前見到佢兩個既表現，我知個女仔都係好愛我老死，但事情就係咁，最愛，好多時都唔係同你一生一世既人。
我即時睇阿嫂同我老死呢咁多年既facebook，感受到他們由愛到分開嗰種不能用言語所形容既悲傷。
我CHECK咗好耐，佢兩個都仲係FACEBOOK朋友，但我老死，冇喺FACEBOOK祝福佢。我估，要祝福最愛的人，真係要好大勇氣。
所以，我決定唔寫「好想告訴你」住，為我既好友，幫佢送上一個祝福給「她」，所以寫咗呢篇短篇小說。
各位，點解最愛好多時唔係一生一世嗰個，因為當最愛喺你身邊既時候，你唔知佢係你最愛，所以你唔會對她好好，唔會在乎佢，但當佢走咗，才知道，最愛原來一直喺身邊，不過已經太遲。
珍惜眼前人，2016，祝所有情侶，都可以一生一世，與最愛既一齊
**特別多謝MARK TAI
Youtube link
一秒停延
https://www.youtube.com/watch?v=Ks6z3fGYqSo
