近排睇到篇關於做搞手既文章, 小編實在心同感受, 有感而發.
呢幾年好少有機會係香港留太耐，朋友之間既聯絡主要靠電腦，手機短訊等方法，但每次都會覺得傾得唔夠爽。難得返來一次，當然想把握時間同班老死見面。但每次當你滿心期待既時候，總會係佢地既口中出現以下既理由:
「SOR呀，女朋友話要我要陪佢。」
「要返屋企食飯。」
「今日返完工好攰，下次先出。」
「幾時得閒」已經變左每次約聚會既一個大前提。諗諗下,其實都難怪既, 而家各有各忙, 大家再唔係以前每天都會係指定時間, 地點返學見面既同學。個個有毛有翼, 要約一次齊人既飲聚，有時候真係覺得比約心儀既女仔仲難。基本上, 以上既理由都聽過唔只幾廿次，到終於有一次成功約好。到約定時間既前一個鐘, 心諗一句: 「今次冇死啦掛。」叮叮叮! 你個Whatsapp group係呢個moment就會有幾個配上幾個表情符號既‘突然出席唔到’既藉口。
「喂SOR! 我條女突然之間得閒。」
「呀媽原來煮左飯。」
「喂走唔到呀我 公司同事有GATHERING。」
然後下面就開始出現好多個張學友既cap圖。
當然仲有成千上萬個令你哭笑不得既理由不能盡錄，先唔談論其合理性或可信性, 重點係, 其實呢啲理由既潛台詞都是三個字「我唔黎」。
呢啲藉口固然令人又無奈又火, 但同時令人覺得好疑惑。
係太耐沒見, 所以我唔知你變左, 定係根本係我自己太掛住朋友呢？大家都咁多年兄弟，你幾時變到愛回家架? 你又幾時從以前成日叫自己做浪子,話女人如衣服, 到而家變左「老婆奴」?
坦白講大家稱兄到弟咁多年了, 而家連你條女都不如? 從前既「上刀山落火海」, 如今連食個飯都都搞唔成, 究竟問題出左係邊呢?歸根究底, 都是「兄弟」兩個字既錯。
兄弟或者姐妹, 本來就係用黎稱呼有血緣關係既男性，其背後既意思在於: 即使任何情況下,大家之間既關係都冇可能分割或否定。係現代既社交圈子上, 老友們都鐘意互相稱對方為兄弟或姐妹，目的都係希望大家都可以好似真正有血緣關係既家人咁, 互相包容和扶持。
但正正因為呢個稱呼的關係, 反倒成為一種誤會。
「喂大家兄弟, 你唔係因為咁小事就嬲我下話? 咁我真係突然有事，好應該包容我姐, 唔係咩? 我地兄弟成世人流流長, 怕咩見唔到姐。」
的確, 朋友本來就應該要包容同體諒, 上刀山落火海都只係電影為左突出友情既可貴先出現既對白, 可以好肯定大部份既‘好兄弟’從來就冇諗過會有呢一刻。作為朋友, 其實都只係簡簡單單咁希望大家之間有一種羈絆, 灰果陣有寄託，開心果陣可以同人分享, 成功既時候有人為你鼓掌。
但同時, 廣告都有講啦, 朋友係要見架。長時間既疏離，可能唔係好覺但慢慢就會開始變得唔熟悉對方, 最後連難得見面果陣都冇野好講, 我相信呢個結局應該唔會係大家所期望既。在社交網絡發達既時代, 可能大家即使身在唔同地方都可以溝通, 但講到最好既溝通方式都係面對面最爽? 作為兄弟, 身在同一個地方又有時間既時候, 但大家都只係繼續係電話, 電腦上聯絡, 最搞笑係能夠見一面既機會只可以係街上偶遇, 你唔覺得有啲奇怪架咩?
講到尾, 你條女得閒, 呀媽煮左飯同公司同事既Gathering, 關我地一早約好既飯聚X事咩!
所以如果你身邊有一班好朋友, 唔該珍惜大家見面既機會, 如果唔係第日只會變成掛著‘好兄弟’名牌既陌生人。
