如果你有追開漫畫,
我諗你一定對我以下想同大家分享嘅話題有一定共鳴。
話說幾年前,當漫畫仲係以打鬥冒險漫畫為主流嘅時候,
出現左一本風格完全唔同嘅異類;
封面唔係一大埋角色出曬絕招，又火又爆炸又chok樣又剩咁,
又而係一個文弱書生坐定定喺一張書檯前面畫野。
正當我心諗呢本野有冇人買既時候,我身邊一位漫畫愛好者朋友阿強即時大叫:「小畑健呀！正呀！」
隨即拎起呢本佢連個名係乜都未知叫乜既漫畫去櫃檯比錢。
我諗大家都知我講緊邊一套漫畫。
果套就係早兩年被人讚到天上有地上無,講述兩位主角點樣由普通中學生,
為理想拚搏,最後成為人氣漫畫作家嘅奮鬥故事。
好多追完故事嘅人應該都同當日嘅老希一樣,
心中不禁嘆息一句:如果真城最高同高木秋人出生於香港,真城頂多都只係可以part time 畫下插畫,
好多前輩都話過,香港係一個磨滅人理想同鬥志嘅地方。所以好多人都會話,就算美斯喺香港出世,
可能佢今時今日都只係一個喺銀行番緊朝九晚五(ot另計)嘅普通白領。
今時今日喺香港追夢想好多人都覺得好戇居。
老老實實,夢想真係唔可以當飯食。
肥肉榮何嘗唔想做一個偉大嘅舞蹈家、老納曾幾何時都諗過做歌手。
可惜嘅係,住喺香港,你唔食,你屋企人都要食;就算連你屋企人都唔駛食,
你都要交稅供養班唔駛做嘅新移民搾Benz、請印傭、同埋每年一次嘅外地遊學團。
直到有一次,身邊有位朋友同老希講:「喂老希,其實你個人咁中二病,不如寫個故仔啦。」
我自己做人冇乜好偉大嘅目標同理想,我只係想學張家輝(正確啲係程輝)咁講:「我唔想熄燈嘅時候,一件值得記得既事都冇。」
機緣巧合下,我開始做一個唔識寫書面語嘅作者,接觸到另一個世界。
慢慢我發現,原來香港都有一班人一直去追自己嘅目標。
香港一樣有可能出現爆漫嘅故事。
最起碼我見到一個類似漫畫入面比主角奮鬥嘅平台 - 紙言。
有人想喺度挑戰自己;
有人喺呢度將自己嘅故事,放到上戲院嘅大銀幕。
呢度係一個將不可能變成可能嘅地方。
我由一個求其寫兩句就當交左文嘅作者,
開始慢慢在意排行榜嘅位置,
開始在意大家對我寫既野有乜睇法。
我開始明,點解高木同真城每期Jump出版都會即刻揭去排行榜。
有人話,作故唔係求分數。我諗其他作者朋友同我一樣都想知道，
自己比其他人差啲咩。
老實講,排名真係唔重要,重要嘅係,你見到有一班人同你一齊奮鬥,
你知道追夢嘅路上唔單只有你自己一個。
見到每一位作者都努力創作,自己又會有另一鼓衝勁去再努力;
唔係單單係想超越其他人,更重要係想証明自己係有能力去為理想奮鬥。
喺現今香港,一個磨滅人理想同鬥志嘅地方,
依然堅持到嘅夢想就更珍貴。
我諗大部份人眼中,只想得到亞豆美寶,
但喺呢度,我終於有機會做一次 亞城木夢葉 。
