我識好多朋友做老師, 佢哋大部分都係好有熱誠, 真正係貢獻社會。但好可惜我亦都識三幾個以人類而言都好奇怪嘅人一直從事教育工作, 我直頭覺得如果我有小朋友, 做著佢哋學生, 不如唔好返學放任自然仲會成長得更好。佢哋唔係唔理小朋友﹑虐待佢哋嗰啲變態, 而係佢哋內心好扭曲。
例如:
(一) 有位「朋友」覺得其實教細路係咁教, 但其實人做咩都改變唔到呢個世界, 包括環保係無意義嘅...... 大佬呀, 你自己懶唔願意為呢個世界行多步咋。我唔覺得一個自私得咁明目張膽嘅人會教到啲小朋友點, 同埋佢自己都覺得自己咁渺小咁無力嘅話, 我憑咩覺得佢可以教育到一個小朋友?
(二) 有位「朋友」永遠大時大節放閃係單人相, 但又高調鳴謝對方送幾貴幾靚嘅嘢, 但名呀tag呀乜都無, 我甚至懷疑好多次係唔同人, 但我覺得更似嘅係做緊小三。放閃可以, 送幾多嘢都可以, 但不可出名/樣。如果連自己都唔可以行得正企得正, 但又不甘低調, 即係做咗啲自己都覺得唔好嘅嘢但又要周圍同人講少少咁, 我唔知道佢到底知唔知咩叫啱同唔啱, 咁點教小朋友呀?
好多時候其實老師真係唔係聖人, 講粗口食煙飲酒嫖賭我都覺得無咩, 重點係佢哋知道自己做咩而且言行一致。如果講一套做一套, 人前人後兩個樣, 其實同啲扮信耶穌嘅仆街無咩分別(教會入面就斯斯文文憑人叫弟兄姊妹, 出咗門口就同朋友講粗口講是非咒罵人)。
而以上提到嗰三幾位朋友, 係自圓其說或者發現自己前言不對後語嘅能力都欠憑。