「係咪佢同你講話我鐘意你？」
沉默咗一段日子嘅facebook對話框彈出嚟。
「下⋯⋯有啲咁嘅事咩？」
我扮冇聽過，實情我早排係佢好朋友口中得知，而我其實都對佢都有好感，但告白呢種事情，好似都係要等男仔做主動。
「你唔好誤會啊，我當你阿妹咋。」
「哦，好。」
呢句說話就好似一條黃河咁，將我哋嘅關係分得清清楚楚，一直到好耐好耐嘅之後，我都冇表達過我內心對佢嘅想法同感情。
中學畢業之後，我哋入咗唔同嘅大學，雖然我哋之間都有好多common friend，但每次約都係分開約，唔會有機會見到。原本以為我哋唔會再有任何交集。直到大學畢業冇幾耐，因為一次舊同學聚會，我哋又重新見返面。
「喂好耐無見。」
你主動行過嚟同我講嘢，語氣好似同緊一個老朋友傾計咁。
「係啊真係好耐冇見。你最近點啊，畢咗業都一排，搵到工未？」
實在太耐冇見過，唔知應該由邊度講起，都係講下尷尬客套說話。
「搵到啦，而家係公司都做，係忙啲成日要ot，不過咁嘅人工，差唔多啦。」
佢微微皺眉。
「唉，你就好，我連工都未搵到，好想快啲賺錢啊。」
我話。
「慢慢嚟啦，你咁叻女，實搵到嘅。」
佢表情望落一啲都唔替我擔心咁。
「希望係咁啦。喂，唔講呢啲衰野，你有女朋友未啊？」
我實在唔想再諗到自己失緊業所以諗住是但換個話題。
「拍咗4年幾啦。」
佢話。
「下？幾時嘅事？點解我完全收唔到風嘅？」
完全唔知情嘅我驚訝到擘到對眼大一大。
「喂你得唔得架，佢係我哋中學架喎，入咗大學無耐就一齊啦。」
佢呢刻個表情就好似望緊一個白痴咁。
「嘩，拍咗4年幾，差唔多可以結婚啦。」
我奸笑。
「傻咩，岩岩先出嚟做嘢，草多幾年錢先啦。你呢？」
佢又將個波推返比我。
「我？冇啊，冇工冇仔冇樓，百冇，loser一個。」
我如實作答。
「點會冇男朋友啊，你條件又唔差，我唔信冇人追你囉。眼角高睇唔上眼咋話？」
佢追問。
「追係有人追，但冇一個岩，唔想為拍而拍，寧缺勿濫啊嘛。」
我鬆一鬆膊，故作輕鬆。
「唔緊要啦，仲後生，玩多幾年拍都未遲啦，拍拖都好煩架。」
「食屎啦有拖你拍仲嫌，擺明曬命啦。」
我扮哂要打佢，佢笑笑口又配合我咁避開。
時間好似去返中學時期係課室打打鬧鬧嘅日子咁，叫人好懷念。
嗰次聚會之後，我哋班common friend多咗玩埋一齊，然後我哋又由舊同學變返朋友。無耐之後我都搵到正職，但依然都會每個星期抽時間同班朋友食下飯飲下酒呻下工作上嘅煩惱。每次朋友聚會都會有我哋兩個出席，有時工作上有難題我亦會私下whatsapp問下佢意見，佢又會好努力咁幫我分析問題解決我，而佢有時想比女朋友驚喜又會whatsapp我請教我應該點做。我哋嘅關係又從朋友變成好朋友。然後日子就一直循環，直到⋯⋯
音樂突然響起，將我係我嘅思緒入面抽返出嚟，我將視線移到門口，見到悉心打扮咗一番，一臉幸福嘅新娘挽住佢爸爸嘅手臂，慢慢行向已經係台上等待已久嘅新郎。其實唔係第一次見你著西裝，不過唔知點解，總覺得你今日特別成熟，特別地穩重。可能因為你係我哋呢班朋友入面最早結婚，感觸特別多。誓估唔到，當年12、3歲嘅大家都已經到咗成家立室嘅年紀，時間真係過得好快，快到我都有啲唔捨得⋯⋯
婚禮完左之後，新郎同我哋呢班豬朋狗友決定去食宵夜。
「喂恭喜你喎！拍咗咁多年拖終於結婚啦！」
大家將啤酒罐舉起輕輕一碰，我飲咗一啖之後再笑住講。
「多謝哂！你呢？你幾時搵返個男朋友快啲結婚啊？你估你仲十八廿二啊？就三十啦。仲唔努力等咩啊？洗唔洗等我介紹我啲荀盤同事你識？」
佢好落力想幫我脫單，似乎好驚我會成為老姑婆。
「順其自然啦。」
我尷尬笑一笑，繼續食嘢，避開呢個話題，無謂係高興嘅日子講呢啲，雖然都嚮向拍拖，但同時又覺得自己一個都好舒服。
宵夜係半夜三點就食完，然後因為實在太攰我哋就直接散band冇下場。大家係的士站互相揮揮手就準備各自散去，微醉嘅我都笑笑口咁同大家講byebye，轉身前望到你臉上洋溢著幸福嘅氣息，作為多年嘅好朋友，我衷心替你感到開心。
而我依舊，繼續等一個人。
