「我好忙啊唔傾住。」
身在外國留學嘅我眼尾都冇望過skype視窗入面一星期skype一次嘅父母，淨係望住英雄聯盟遊戲視窗個排隊時間逐秒逐秒咁過，巴不得快啲排到可以收線比我同我班豬朋狗友打機。
今年嘅我岩岩飛咗過嚟英國讀大學。
係英國讀書比起係香港讀得輕鬆，假期又多，所以基本上過咗嚟英國之後有更多嘅時間比我打機娛樂。
因為第一次離開屋企出嚟住，做父母自然會擔心自己嘅仔女生活得好唔好，有無照顧自己得妥妥當當，再加十幾萬句佢哋嘅「關心」，姐係我哋後生嘅覺得嘅多管閒事同麻煩。
但始終都係父母，所以每一個禮拜都會抽少少時間出嚟同佢哋skype下俾佢哋望下有冇瘦到，只不過我通常都係一邊打機一邊傾。
「岩岩放工好攰我要訓啦。」
畢業之後好順利咁係外國搵到工，依然同父母相隔半個地球。
因為時差，又要返工由朝做到晚，放工返到屋企已經攰到飯都唔想食，次次同父母skype都係望兩眼就合埋眼攤咗係梳化抖下，有幾次仲訓著埋要對方收線。
「阿囡又喊啦要換尿片啦，換完又要烚奶樽沖奶，唔講啦。」
結咗婚嘅我個囡岩岩滿月，晚晚同老婆輪住半夜起身餵奶換片。
日抖又要返工，雖然望住阿囡好幸福，但黑眼圈都犀利到嚇死人，不過知道父母都會想見下個孫，所以都會盡量有時間就會skype比佢哋望下同孫女玩下。
日子一日一日咁過，轉眼間個囡已經五歲，可能因為係女仔，幾乖幾聽話，都算好湊，所以開始考慮一家人新年假去旅行。
「去歐洲好冇？你哋幾年前唔係話想去？」
正當我苦惱去邊好嘅時候突然醒起幾年前父母講過。
「你老豆又唔行得又唔搭得長途機，坐住輪椅推上推落又麻煩，玩都玩得唔安落，一陣你哋又要湊住阿囡，又要湊住我哋兩個老弱殘兵，阻止你哋後生玩。我同你老豆唔去啦，你哋去啦！」
阿媽笑住咁講。
我周圍世界突然靜止哂，我望住skype視窗入面嘅父母，發現原來佢哋面上早已佈滿皺紋。
頭上嘅黑髮都早已換上白髮，皮膚比起當年係機場送我上飛機出國留學嘅時候鬆弛咗萬分。
回頭一望，原來有十年冇好好望過父母一眼，好好坐低面對面同佢哋傾下計。
歲月不饒人。
你用大半生嘅時間望住我成長。
但到我有時間，有能力帶你周遊列國享清福嘅時候，你卻已經一頭白髮、行動不便。
然後我就開始後悔了。
後悔求學時期淨係識得玩淨係掛住娛樂，畢咗業踏入社會之後淨係掛住賺錢淨係知道自己返工好攰，結咗婚之後淨係識得照顧妻兒做個好丈夫好爸爸，卻忘了做個好兒子。
