想見你 想見你 想見你
因為想見我，妳到有我的過去
因為想見你，我到有妳的未來
從何說起。。這套戲給我的後勁太過強大，完全顛覆我對愛情劇的認識，我無辨法分析全部好處。但睇到呢到既你，絕對要去睇一次想見你，一部設定非常複雜但完成度近乎完美既藝術品。以我而言，一次唔夠，係無論睇幾次，幾時睇，亦可以發掘到新既點。無明星效應，全是故事架構完美令一切變得完美介紹萬樣完美之處前，先說一點點的不完美。首先近來一直睇韓劇既我睇這套時畫面不夠唯美，一d深刻既位(雨下奔跑)分鏡唔夠雖然遠景好靚，但男主鍾情瞬間近鏡會更有feel。取景好好，調色上仍可以加大過去現在既分別，純樸既台南同多姿多彩既台北。男二演技亦是有一點點出戲。仲有一點想人解答:男主決定按女主過去所說去追求2010的女主，話過女主曾經同佢講佢既離去只係一切既開始。但女主前兩次穿越未知佢係王詮勝，而第三次已經改變未來，咁句野係幾時講？
回憶殺—
90後香港人大抵係聽住周杰倫睇住海派甜心學普通話吧。我對台劇既認識亦停留係那時期，現在不禁回想點解每套劇都用一樣的梗但仲係會好沈迷d富家子弟失憶或者綠茶婊衫菜。再次回到想見你那滿滿的台腔，經典既台灣電單車，街道，小販攤，回憶滿滿。以為佢又係d老套梗？錯了，有著不比Inception差既時空觀，打破時間既愛情，令我一直諗起一句:有雞先定有蛋先？
穿越—
整個時空概念在劇中不停穿插，然而不同時間既轉接以完美狀態達成，絲毫無凌亂感覺。由第一集已經開始燒腦，98年既開頭，19年既過程，到係結尾解釋原來不同角色既人生。每一句台詞都幾乎埋有伏筆，所有情節環環相扣，觀眾係不斷拼湊的時空碎片中搵到通向結局既線索。當你以為解開謎題時下一刻又會帶你入更深的地方，每一刻都值得好好細味因為每一刻都係關鍵都有佢出現既原因，每一鏡都係朝結局發展。網上說是神捉著編劇手寫的劇本，我完全認同。除左中間不停轉換既時空，淨係現實，夢境，幻想既切換都係恰恰好，你會覺得非常複雜，但你唔會感到錯亂，而會更吸引你沈迷下去。同時空相遇亦係新鮮，主要帶出改變過去既可能性，同時亦係對自身既審視。倒敘手法似玩揭尾故，推理過程令人坐立不安但一切皆合理，故事所有伏筆都完成得近乎完美，可以說係找不到絲毫錯處的穿越劇本，而我講緊係比一般穿越複雜十萬倍既故事(女主穿越2次/男主穿越加同時間段相遇/反派穿越2次)
談情—
令人又喊又笑既故事中，包含既係較黑暗既題材，陳韻如對自我身份既否認，王詮勝既同性戀，莫俊傑盲目不健康既愛情，黃雨萱裝作一切正常但內心已死。每個角色都有悲傷一面，而所有人設都非常鮮明，同時劇情中人設交代非常完整，毫不含糊。似第一集既幾段對話勾勒出女主性格，montage帶出既過去加強觀眾對女主內心既共嗚(第一集戒指位已經喊左)除左王詮勝果段小插曲，其他人設隨著劇情更加立體。親情係加分點，我好中意佢講出年齡漸長愈能了解父母既點。當然，最重要係男女主既愛情故事非常完整呈現，由過去李子維鍾情既瞬間同原因，到未來黃雨萱的定情位，學園內青春純愛，出社會同居互相扶持，分離後悲痛欲絕，前因後果描述細緻，原因解釋清楚。係13集內，無一幕係多餘，無數既碎片一直收補完整各條線，故事描述剛好，沒有多餘，但亦沒有不足，恰好將要解釋的都解釋了
演員—
好重要好重要好重要，近乎完美既劇本，不斷交錯既時空碎片，人物角色，對演員要求極之高。我由心配服影后既演技，兩個角色完成度極高，無任何硬件分別的情況下(同一件校服)要靠表情眼神去分別係劇本重要既要求而佢完美達到，有時同一情節用兩個不同人物既心態去演，亦有不同的哭法。可能無人留意到，最屈機係最後用陳韻如角色扮演黃雨萱，其實係非常變態，但觀眾已經當左佢地係不同人，所以睇時可能唔覺。事實係兩個人物同佢地crossover都係由一人完成，而無違和感代表佢太成功，角色似為佢而設。男主扮gay有驚喜到，由屁孩到成熟既轉變亦出色，不過始終基於同一人設，大體上不需太改變，主要係女主實在太強大了，其實對不同年齡段詮釋既自由切換其實都係難。ps:我真心覺得佢長髮好似Hebe 太多想講，但不知點講。
睇完仍然心有餘悸既劇，好似一齊穿梭左時空見證刻骨銘心既愛情，亦好似沿途學到一點道理，亦好似途中跟住人物自我審視一次，如果可以回到過去，你會想做咩？到最後，女主不執著對過去既回憶，而相信未來，相信佢地既命運必然再度交錯，因為本來佢地就是命定。好似30多歲李子維的自白，係千萬次偱環時空中，不管發生任何事情，佢仍然會愛上她，從不後悔。亦像歌詞說: 穿越了千個萬個 時間線裡 人海裡相依 因為想見他，女主回到過去令男主愛上她。
因為想見她，男主去到未來令女主愛上他並成為過去式女主的過去。
因為想見，無論如何，都會相見。
