話說小弟喺一個十分熱愛足球嘅人，由細到大都好鍾意足球，屋企都放滿晒同足球有關嘅嘢，多到有啲要送去迷你倉。
我有個女朋友，叫阿儀，同佢一齊咗差唔多兩年，一直關係都幾好，但佢似乎唔太鍾意我成日去踢波唔同佢出街，有時我買咗啲新波衫翻嚟，佢又會話我晒錢，不如儲錢結婚。我都明佢喺顧家，好識為未來著想，但呢個喺我由細到大嘅興趣嚟㗎嘛，情侶之間唔喺應該互相尊重對方嘅興趣咩？因為興趣嘅問題搞到呢排大家都成日嘈交，差啲要分手，好彩九牛二虎都掹得翻。
有一次同朋友踢波，行緊去球場嘅途中，竟然見到阿儀同一個陌生嘅男仔拖住手行商場，我初頭都以為喺認錯人，但見到佢袋上面我送比佢嘅嗰個吊飾公仔，我就自己慘變綠燈俠。如是者，每次去踢波，就每次都見到阿儀同個男仔一齊，我試過即時WhatsApp 佢問佢喺邊，佢話係屋企做緊project。我個心好痛，我唔知可以點，我唔想無左佢，但喺又要挽救翻男人嘅尊嚴，我好辛苦，於是我日日攞住個波，一嚟監察佢地，二嚟去個球場到當個波喺個男仔一樣轟轟轟咁射埋個龍到，將心入面嘅怒火一下一下咁加落個波到。久而久之，我嘅腳力強於荷蘭嘅史奈達，重炮手嘅我喺街場獨當一面，每次諗起個男仔，都會加強力度，連柱都差啲射彎埋。
有日踢緊波，一個鬼佬行埋嚟，用英文問我：「我喺英超球隊利物浦嘅球探，我地想高價搵你去我地球會，唔知你點睇呢？」我當初都以為係騙案，但見到佢張證件就成個人開心到彈起。佢地簽左我3年約，38場聯賽正選上陣35場，第一季就9入球26助攻，有7個入波都禁區外轟入去。我去英國踢波嘅事都無同阿儀講，因為去到後期我地連IG都block埋，差在未講分手啫，走之前我只喺同佢講我比大學安排去英國做exchange 可能3年後先翻，聽到佢只係應一聲「喔」，我就知道段關係救唔翻。
依家我仲喺利物浦踢緊，啱啱續約到2023年，住緊2層獨立屋連私人泳池，同個鬼妹拍緊拖下年結婚，我知道今晚金球獎典禮會喺TVB全港直播，所有報紙頭條都會喺我個名。阿儀，多謝你，令我可以企喺呢台上面，望住妳同個男仔一夜間成過街老鼠、狗男女！
