〈自我。他我。〉
抗爭需要一個平台，喺鎂光燈下受盡其他人輕蔑嘅目光同恥笑。咁就寫出嚟啦！冇嘢比用自己最拙劣嘅方式更能展示自己嘅卑劣。
文字啊！喺呢時代係何等廉價嘅事。成千上萬嘅一般人喺社交平台上隨便寫啲有謂無謂嘅嘢，就有成千上萬嘅一般人和應。佢哋認為自己係明星，係主角，盡可能將自我膨脹。
啱！你講得啱。我喺呢到寫文純粹係自私嘅行為，就好似無數人upload到網上嘅selfie一樣。每一樣upload嘅嘢，都好似同其他人講「我係獨一無二嘅」、「我係主角」，「所有人都要見到我」。
人哋自拍，腳下卻踏住別人嘅影子。人渴望獨立，渴望與眾唔同，但係貌似互相獨立嘅個體，又喺社會群體中互相影響住。事實上，人只係一群自以為滑稽嘅小丑，到處光榮噉彰顯自己嘅拙劣。
如果有一個生有尾或者翼嘅人，佢嘅生活作息或者有研究價值。一般人呢？咪又係每日營營役役噉工作讀書，咪又係吃喝玩樂，咪又係表裡不一，有咩特別嘅地方？
人都有向外展示嘅個性，將自己放喺鎂光燈下同其他人分享。各塊碎片黏合成絕美嘅虛惘，或者就係眾人所盼望嘅烏托邦。
一切，一切，都不過係種呻吟！惡意嘅呻吟！具目嘅性嘅呻吟！佢哋將內心正面或者負面嘅情感宣洩，渴望得到其他人嘅認同和關切，只有呢樣嘢先能夠得到所缺乏嘅愛同體驗自我嘅獨特性。
可悲呀！人總係難對自我有完整嘅覺察，亦好難作出改變。縱使扮到唔在乎，都無可避免會因為讚好數、訂閱數、觀看次數、留言等等，一時鬥志激昂，一時絕望頹喪，一時惘然若失。
我就係咁樣嘅人。我對自己唔了解，甚至可以話係毫無認識，但又霸佔住呢個軀殼。尋找自我係幾咁困難嘅事呀！呢個係苦惱一生嘅課題。
都係做返一般人啦！就好似每日瞓喺床上𢯎肚腩同玩手機嘅人，除咗俾梁啟超斥為旁觀者之外，應該係件美事。
佢哋係活躍嘅平凡革命者，認為任何事都喺平均而可理解嘅狀態。佢哋天資過人、特立獨行、黑白分明，鍾意用「我肯定」、「我覺得」、「我認為」發言。佢哋經常以主觀嘅感受做判斷，一切喺佢哋口中都變得簡單而理所當然。
佢哋充滿住好奇心，有極高求知意慾，追求新鮮感，囫圇吞棗噉閱讀各大小娛樂新聞、電視採訪節目、影片網站、社交平台、通訊軟體訊息、玩遊戲，只要係同自身無關嘅瑣碎事都一清二楚。佢哋全神貫注喺外在世界，但對任何事都漠不關心、隨波逐流，只會做唔用腦同唔嘥精神嘅無謂嘢打發時間。
可憐呀！人係卑劣而矛盾嘅。一方面又想展示自我，體驗獨特性，感覺愛；一方面又怕與眾不同，追求平衡，怕受批評。講到尾，最容易為人忽略嘅係不論邊種想法，「我」都係建立喺別人嘅認同同睇法之下。
唉……喺社會生存，無可避免會同其他人交往，互相影響，建立自我身份同自我認同，呢個係人生嘅階梯。但同時人又喺交往中迷失自我，惘然惆悵。到底人要點樣先可能搵到自我？
我係愚蠢嘅人，實在唔能喺混雜嘅社交中搵到屬於「我」嘅部分，所以就只好將自我封閉，先將唔屬於「我」嘅部分除去，雕出大衛像。
