你有無諗過，世界上點解有聖誕老人？無啦啦送禮物畀你個仔......
唔使擔心，我地係好人黎嘅。
無論係牙仙定聖誕老人，所有「無事獻殷勤」嘅團隊，其實都係屬於「快樂聯盟」。
簡單黎講，我地令人快樂，再收集快樂做能源，對抗邪惡勢力。
邪惡勢力係點，就唔多講啦，係另一個部門嘅事，即係「唔關我事」，總之就好邪惡啦。
點解我地要趁節日、小朋友甩牙......先走出黎，而唔係平日都出黎送禮物？
好簡單啫，出師有名丫嘛。
如果有個人，三唔識七，又唔係逢年過節，無啦啦走出黎送禮物畀你，你唔覺得呢個人相當有嫌疑咩？
工作內容解釋完，我諗大家都明白，「聖誕老人」有幾咁高尚同偉大。
而我，第一年番工，躊躇滿志。
我相信憑我嘅熱誠同愛，一定可以令每個小朋友都好快樂。
著制服，貼埋假鬍鬚，我開始托夢小朋友。
無錯係托夢，送禮物之前，首先要知道小朋友想要乜野，先可以用最少嘅成本，令佢地獲得最大嘅快樂。
「小朋友，我係聖誕老人啊，你想要咩禮物呢？」
我笑瞇瞇咁望住八歲嘅康康，我嘅第一個目標。
我手一揮，展示出一堆珍藏，由顏色鮮艷嘅玩具車，到益智好玩嘅積木。
康康皺眉：「得呢啲咋？我想要Switch。」
我都未聽得明，康康就搵咗幅圖畀我睇，係新出嘅遊戲機，三千幾蚊部。
「係唔係聖誕節送畀我啊？」康康滿眼期待咁望住我。
不過，我估，為咗令小朋友開心，錢呢啲野，身外物黎啫。
點知一番到公司，就見到幾個同事喺經理辦公室，七嘴八舌咁講：「唔掂當，個細路要iPhone X，我自己都未有啊。」
「我果個就無講明要乜，不過佢望住啲玩具車，我感受到佢嘅鄙視囉。」
「哎呀，是但塞盒積木畀佢地得唔得？」
「我地唔係去送禮物，正職係收集快樂，小朋友唔滿意，咪唔快樂囉，蠢材。」
一班聖誕老人望住經理，雪白嘅鬍鬚不斷抖動，我地都只有一個訴求：加Budget。
經理輕咳一聲：「我地唔贊成小朋友沉迷電子產品，加Budget係無可能嘅。」
唉，我都明，啲電子產品郁啲就幾千蚊部，真係要送，咩公司都破產啦。
經理義正詞嚴咁講：「建議你地同小朋友談吓心，了解佢地真正嘅需要，先會收集到真正嘅快樂架。」
官腔人人都識講，唉，唯有信住先啦。
今次，我決定去女仔嘅夢入面，女仔應該無咁想要遊戲機掛？
「聖誕老人，我想唔使讀書，唔使做功課，唔使考試，你幫唔幫到我啊？」
我可以點？咪唯有同佢講讀書幾重要，跟住，佢將我趕出夢中。
「聖誕老人，我想靚女啲，要好靚好靚果隻。」
我猶豫：「咁即係想要化妝品？」
「唔係，我要真係靚，『清水出芙蓉，天然去雕琢』果隻。」
吓，乜依加小學啲中文咁深架咩？
結果，我一個小朋友嘅快樂都無收集到，只得一堆白眼。
我唯有聯絡吓啲同事，問吓大家有咩方法。
點知一問，就聽到有個同事被永久取消聖誕老人資格。
原來，佢又唔夠錢，又想得到小朋友嘅快樂，就上網買咗啲樣板遊戲機，剩係得個殼，開唔到機，幾十蚊部果種。
佢將遊戲機包到靚一靚，小朋友收到，梗係好開心，佢就收集咗小朋友嘅快樂，逃之夭夭。
之後小朋友發現部機係假，當然會投訴。
雖然聖誕老人公司無投訴部，佢地亦唔知點聯絡聖誕老人。
但呢個年代，網絡咁發達，小朋友隨便上網講兩句，公司好快就發現咗，並且炒咗個害羣之馬，以免影響成個聖誕老人業嘅聲譽。
唉，雖然呢位同事係做得唔岩，但都算有諗頭，我就連方向都無啦。
呢個時候，同事阿洪同我講：「不如聖誕節，我地一齊去非洲。」
「去非洲？我仲未跑夠數喎。」作為一個聖誕老人，我點會聖誕節去旅行。
「唔係旅行，係去收集非洲兒童嘅快樂。」阿洪分析：「你諗吓，依加城市咁發達，細路都唔稀罕啲尋常玩具啦，要哄佢地開心幾難。」
係喎，未發展國家啲小朋友就唔同呢，食都食唔飽，
我地送吓野食、生活用品，佢地一定好開心，雪中送炭總好過錦上添花，仲可以做吓善事。
阿洪見我明白，拍吓我膊頭。
但我計吓條數，用買玩具嘅Budget黎買生活用品，係就係岩數，但來回機票呢？
去非洲唔平架喎，經理實唔會加Budget畀我地架，唔通阿洪又有好辦法？
