上集：https://post.shikoto.com/posts/144075-今次到我取西經（上）
我開始習慣搖搖晃晃嘅生涯，但我發現，我好似愈黎愈樣衰。
由小白臉變成黑炭，皮膚又粗又乾，相反護膚嘅沙僧就愈黎愈靚仔。
我幾時意識到呢個問題，就係有一日，沙僧俾女妖捉走咗，逼佢成親。
當然，孫悟空救咗佢番黎，沙僧都無受到咩傷害，我嘅心靈就大受打擊。
喂，女妖唔係應該睇中我架咩？點解會變咗沙僧？
但係望下沙僧依加個樣，再望下自己......果然去到邊，「Your face, your fate」都係真理。
我就安慰自己，唔緊要嘅，咪當少啲麻煩，我老人家都唔係靠樣搵食。
但係除咗女妖睇中我，仲有妖怪捉我係想食唐僧肉，呢啲劫數就避唔過啦。
我第一次俾妖怪綁起黎，妖怪去準備烹調。
講真，我係一啲都唔驚，我知孫悟空實黎救我，我會毫髮無損架嘛。
突然臀部傳來一陣劇痛，打開眼一睇，先見到有兩隻小妖怪用尖牙咬我，咬到出晒血。
我梗係掙扎啦，但我被綁住咗，始終逃唔出佢地嘅尖牙，結果硬生生被咬甩兩塊肉。
我嘅動靜好快驚動到出面嘅妖怪，一隻大妖怪衝入黎，捉起兩隻小妖怪，打咗佢地兩下：「衰仔，唔准偷食，話明要煮熟先食架嘛！」
然後佢帶走咗兩隻小妖怪，喂，咁就算數？我無咗兩舊肉喎。
呢個情況，就好似過年啲小朋友未等人黎拜年，就偷食糖果咁，係好無禮貌架，不過通常家長都唔會大懲罰。
但作為果粒糖，我真係好難受。
喺我被煮熟之前，孫悟空果然黎救咗我。
作為妖怪，佢地一致認為，少少傷啫，好快無事。
但係我坐喺馬背上，一路搖，傷口一路磨擦，果種痛苦真係非筆墨能夠形容。
喺我強烈要求下，沙僧終於將果件菩薩賜嘅袈裟，改造成有保護性嘅內衣褲，未至於刀槍不入，但至少唔使再俾小妖怪偷食。
捱啊捱，終於到達目的地：印度。
但比趕路更艱苦嘅事情出現咗，原來我係要讀書嘅！
以前我以為，取西經就係將啲經書，搬番去大唐。
依加我先諗通，如果只係要搵搬運工，應該搵幾個大隻佬，點解要搵和尚呢？
唐僧嘅責任，係喺印度讀通經書，再番去大唐教人，即係先讀個博士學位，再做埋翻譯。
嘩，以前讀中文已經夠辛苦，依加仲要讀梵文經書？
孫悟空、豬八戒、沙僧開開心心咁周圍玩，連隻白龍馬都話自己開完工要放鬆下，成日走去游水。
我呢？截至目前為止，我依然坐喺度聽班老和尚講經，仲要讀熟讀通先有得走。
係，我知道等我讀完書，番到大唐有萬民景仰，但呢個過程真係好痛苦，
呢一刻，前一刻，我都好痛苦。
外人睇你，永遠係睇結局。
但對於自己黎講，衣食住行用咩護膚品先係最緊要，
結局，係一瞬間嘅璀璨；過程先係你自己捱。
－完－
