依加穿越咁流行，瞓著覺就穿越咗，講真我唔係好驚訝嘅。
不過我驚訝嘅係，穿越居然有得揀。
「你好，我係穿越部經理，恭喜你成為我地特選穿越者，你可以喺呢張相裡面揀一個黎靈魂穿越。」
我有少少驚，睇到相都唔知果個古人係咩身份架嘛，就算你比張皇帝相我，我都認唔出佢係咪亡國之君。
我一睇就安心，呢張圖每個我都好熟悉，咪就係西遊記！
我問清楚：「即係話，唐僧、孫悟空、豬八戒、沙僧，我可以四揀一黎穿越？」
經理指一指：「你睇漏咗，仲有白龍馬。」
我無理佢，傻嘅先會想變隻馬俾人騎。
作為一個熱血青年，我第一時間梗係想做孫悟空。
但仔細諗一諗，孫悟空雖然型，但一啲都唔爽，一陣俾唐僧念緊箍咒又頭痛，有咩事又要去打生打死，仲要俾唐僧誤會，好攰架嘛。
豬八戒樣衰，唔使諗；沙僧低低調調好似唔錯，但再望下張相，佢要揹行李喎。
孫悟空同豬八戒都係拎住把武器，瀟瀟灑灑咁，沙僧就拎住個擔挑，咁遠路，咪好辛苦？
剩低一個選擇：唐僧。
取完西經番黎開開心心做御弟，萬民景仰，點睇都唔錯。
「我就揀唐僧。」
經理點頭，叫我確認：「跟住落黎，你就要過佢嘅人生。」
眼前一黑，然後我感覺臀部大力晃動，成個人跌低咗，成嘴都係泥。
班徒弟圍埋黎：「師父，您點解會墮馬嘅？」
岩岩穿越，唔慣騎馬，我忍。
我好不容易爬番上馬背，死死捉實韁繩，幾乎成個人貼住馬背，先勉強唔跌落黎。
但好快，我就好想嘔。
無錯就係暈車浪嘅感覺，而且隻馬仲搖過車，比得上過山車。
「師父您要忍下啦，我地都知小白龍好搖，但佢本來係龍，兼職做馬，都需要時間學習，一係您落地行下？」豬八戒建議。
我死死氣氣落地行，行咗無耐就喘晒氣。
無錯，唐僧嘅負重量係最低，但佢嘅體能遠遠比唔上果幾隻妖怪。
即係馬拉松選手跑四十公里，分分鐘輕鬆過我呢個廢青跑十公里架嘛。
無辦法，我又爬番上馬，呢次真係搖到我嘔，嘔到成個馬背都係。
白龍馬下意識搖一搖鬃毛，又濺到我成面都係嘔吐物。
好彩，我地已經搵到落腳嘅地方，可以梳洗。
岩岩清理完，沙僧就遞咗一盒膏狀嘅野畀我：「師父，您嘅面脂。」
我嚇一嚇：「下，我要用護膚品？」
「護膚品......呢個名幾好，趕路風沙大、太陽曬，唔用『護膚品』，又點保持師父嘅肌膚質素呢？」
沙僧講得好有道理，我就勉強用一用，但用完面脂，仲有好多個護膚步驟，同現代女人果啲潔面爽膚保濕精華防曬......不遑多讓。
用得幾次，我就開始懶，沙僧都無逼我，佢又唔想浪費，就自己用啲護膚品。
