上集：https://post.shikoto.com/posts/141672-男友自殺，入我數？（上）
Daniel支吾以對，話佢要考慮下。
但我未等到Daniel考慮完，反而等到警察，衝入學校，帶我去「協助調查」。
原來Daniel去報警，話同我曖昧果陣，聽我講過阿澤阻頭阻勢，想殺咗阿澤。
我根本無講過，而警察循例問咗幾句，就放走我。
但自此之後，所有同學都對我畏如蛇蠍，好似我真係殺咗阿澤咁，無人再留意Daniel。
利用一件更駭人聽聞嘅新聞，Daniel好成功咁撇清自己，亦證明當日我曖昧嘅對象，係一個人渣。
學校用「品德問題」為理由，勸我退學。
我好討厭呢間學校，但如果我退學，即係認我累死咗阿澤，我絕對唔會制！
我去咗阿澤屋企，搵佢阿媽。
「伯母，人人都話我累死咗阿澤，您點睇？」
澤媽點頭，神情悲傷：「妳都係小朋友，咁樣俾人唱，一定好唔開心。」
果一下，我感動到想喊，佢係唯一一個信我嘅人。
阿澤死後，連我父母都唔信我！
「不如咁，我同學校傾下，證明妳清白，妳可以叫埋妳父母一齊黎。」
終於到我沉冤得雪嘅日子，
校長、老師、我父母，所有人都望住澤媽。
「佢地分手後，阿澤好唔開心，話覺得人生無意義，
都怪我無睇住佢，諗住細路仔分手，過一排就無事。」澤媽一路講一路喊。
事後，我幾次去搵澤媽，佢都避而不見。
而我父母，就畀咗一大筆錢澤媽，當係賠償，又或者希望佢唔好將件事揚出去。
終於，我喺澤媽樓下截住佢：「點解您要咁對我？」
「對唔住。」澤媽迴避我嘅眼神：「阿澤已經去咗，原因唔再重要，但佢仲有弟弟妹妹，我......想幫佢地爭取番少少野。」
係，我知阿澤屋企窮，但係，「為咗錢，就可以屈我？我有咩得罪您？」
澤媽垂低頭，支支吾吾：「其實妳都無損失，妳屋企大把錢，妳又唔使坐監......」
我喺網上俾人起晒底，個個都唱我，我無辦法辯駁，無人肯信我，
原來，人死咗，真係大晒。
我只剩低最後一個方法，證明自己嘅清白，令到大家信我。
我利用四年黎嘅八卦資訊，收集晒荔枝春中學拍拖曖昧事件，開咗個「淫亂校園網」，一直更新，仲開放投稿，
因為咁，「荔枝春中學」被網友譏為「麗春院中學」，
呢件事，比阿澤嘅死更有話題，頓時無人再討論我。
要掩蓋一單新聞，你需要一單更大嘅新聞。
－完－
