上集：https://post.shikoto.com/posts/139403-我生咗條尾（上）

所以，我無切到條尾。
老公安慰我，話有條尾都幾可愛，幾有特色，仲令我有氣質咗......
唉，男人為咗哄女人，真係會亂講野。
為咗解決我嘅煩惱，我睇咗好多書，講點樣面對逆境。
有專家話，應該將缺點變成優點。

我好同意，子都曾經曰過，天將降大任於斯人也，會搞好多花款整蠱佢。
話唔定上天賜條尾畀我，係有特別嘅用意，想我做一番大事呢。
我開始思考，條尾巴到底有咩用。
練習咗一排，我慢慢控制到條尾，點樣捲出去，再縮番入黎，都叫伸縮自如。

然後果排蜘蛛俠上畫，望住蜘蛛俠高來高去，我昇起一個念頭。

如果我靈活運用條尾，飛黎飛去，會唔會係我嘅超能力？
我鼓起勇氣，用條尾捲住屋樑，再成日跳起，嘗試用尾巴吊起自己。
結果，失敗咗。
我成個人撻落黎，仲要塊臉落地先，條尾就更加痛到......好似骨折。

劇痛之下，我逼於無奈，衝咗去睇跌打。
我條尾醫番好，件事亦都揚咗。
跌打醫師好感慨咁講：「我第一次見到幫人醫尾哩。」
唉，我都做好心理準備，俾人歧視，甚至捉去做實驗架啦。

點知等咗一個月，乜事都無發生。
唔通醫師無講出去？好奇之下，我上個醫師嘅FB，佢居然將件事擺晒上網！

但就無乜回應，得幾個留言，都係話外國咩地方有人生尾巴，係返祖現象點點點。
根本，無人在乎我生咗條尾。

結果，呢條突如其來嘅尾巴，無為我帶黎任何好處，但亦無咩壞處。
除咗跌斷骨果次，不過都唔可以怪我條尾，只可以怪我個腦。
唯一嘅改變，只係好似我老公咁講，要買鬆身啲嘅褲。

人生會發生好多問題，令你晴天霹靂。
到最後，都可能搵唔到問題成因，更加無解決方法。
咁又點啫？由出世開始，你就有好多問題、好多缺點，咪一樣可以長大。
問題唔一定可以解決，唔一定可以變成優點，
但係話唔定，可以同你和平共處。

－完－