上集：https://post.shikoto.com/posts/139094-【中秋節特獻】作為一隻玉兔（上）

我終於明白，呢個方法係「紅事唔紅人」，要捧紅嫦娥，我應該從佢自身特點出發。
果啲舊日女明星，係點樣重新引起大家關注架呢？
唔係俾人偷拍，就係出性感寫真，俾人讚「美魔女」。
講到尾，都係要靚要索，唉，外在美唔係咁得，李白幫你寫過詩都無用啦。
好彩，靚唔靚都係靠PS架啫，嫦娥住喺月亮，唔驚俾人見到真人，點P都得。

於是我番去月亮，幫嫦娥影咗輯古裝性感相，出咗本寫真。
有靚女，有事業線，有長腿，配埋啲「嫦娥應悔偷靈藥」嘅文青詩句，點都做到個IG女神掛。
果然，寫真出版後，嫦娥嘅Follower大增，張張相都大把like。

我拎住我嘅成果畀嫦娥睇，滿心歡喜，等老闆嘅讚賞。
「咁月餅盒呢？」嫦娥好幽怨咁問。
「乜野月餅盒？」
嫦娥望住我：「呢啲網絡世界都係虛幻嘅，唯有印喺實體上嘅野，先表示到大家記得我。」

乜野叫網絡世界係虛幻？佢到底知唔知，依加上網嘅人多過食月餅嘅人好多，品牌都要講網絡行銷啦。
我解釋咗半日，嫦娥都係唔聽我講，堅持佢自己果套，成個老餅咁。
不過諗諗下，佢好似又真係一個老餅，仲要唔係六七十歲嘅老餅，係幾千歲嘅超級老餅。
唉，連我呢啲人才都唔識欣賞，但鬼叫佢係老闆咩，我唯有死死氣氣落番地球，再諗辦法。

上電視、上雜誌、上電台都有辦法，上月餅盒有咩門路？

結果，就到最後限期，我唯有上淘寶訂咗幾十個「自製月餅盒」，唔同款式，但全部都係用嫦娥嘅玉照做封面。
咁樣交貨，我都預咗俾嫦娥鬧。
點知嫦娥好滿意，攬住果堆月餅盒愛不釋手，感慨「人類總算無忘記我」。
佢開心之餘，仲畀福利我，等我可以多啲落地球收兵。

從此，我覺得天空都晴朗咗。
之前我好困惑，點解我辛勤工作嘅成果不被欣賞，呃呃哄哄反而成功。
呢一刻，我終於明白，我地永遠都想說服人，講畀人知自己嘅邏輯係岩，
但要得到人地嘅認同，根本唔係要贏，而係要跟住人地嘅邏輯行，令人地覺得滿意。
用簡單嘅說話黎講，想加人工，必須拍馬屁。

－完－